Gurdaspur amakertemji Pakistan nungi aru: Rajnath Singh

New Delhi, July 30 (Agencies): Brihostibar nü Union Home Minister Rajnath Singh-i, Punjab, Dinanagar nung tepsetba kiralongrar asemji Pakistan linük nungi aru ta ashiba den külemi kidanger linük amokmerena, tsükchirtemi amaktsü merangba anema Indian security sepaitemi sashia meyiptsütsü, ta shiogo.

July 27 nü kiralongrartemi Punjab, Gurdaspur district kübok Dinanagar jila amakba dak sentakba nung Rajya Sabha senden nung sangdong agüja Union Home Minister Singh-i, “Global Positioning System (GPS) data mezüng bushisüngdangba ajanga, kiralongrartemji Pakistan nungi Gurdaspur district nung aliba Tash tesem anasa nungi ait, kong Ravi ayong Pakistan-i yimoker,” ta metetdaktsü.

“Ano Dinanagar aser Jhakoladi na tsüngda aliba Talwandi yimtsüng anasa railway lenmang nung Improvised Explosive Devices pongu rema toktsübajia kasa kiralongrartemi inyak südi ta melung malemer,” ta Rajnath Singh-isa ashi.

Senden nung pai, India tsükchirtemi amaktsü merangertem anema security sepaitemi tim inyaktsü, ta ashi.

“Ni iba maongka ya agia House dang ashir, India nung kiralongraba tera nungi atsütoktsü asoshi sorkari inyaker. Ni house dang, India anema arrtsülen kiralongraba noktangtsü asoshi sorkari akokba tashi agi ajak inyaktsü,” ta Singh-i ashi.

Rajnath Singh-isa Punjab Police-i kiralongrar asem kahsetba atema parnok nem tenüngsang agütsüogo.

Union home minister-i ashiba agi, arrtsülen tzünglu sashia aruba ajanga ayong nung tzü tali atsüngba den kilentzü metsüngba ajanga kiralongrartemi India telungi aittsü kokaka mapang ajak nung Border Security Force kümküma lir.