Gurgaon nung Manipur nunger mapa inyaker ka kanga mejungi azük

January 18 (Agencies): Imphal nungi küm 29 tain Romen Abrambam dak office nung ketdangsertemi anir kanga mejungi mezüngmeshia azük. Pa dang mozüki nung temang anepaludar.
Company nung ketdangsertemi company indang tongtibang osang (data) auyaba pa nem tongloktsü, saka Romen-i ashiba agi, pai aji mauya.
Udyog Vihar police station nung FIR agütsüba ajanga ashiba agi, Romen Abrambam shiba Delhi, Mahipalpur nung alir, par manager Abhimanyu Madan-i January 13 nü CEO Puneet Kumar aser Deepak, co-owner TGS IT Solution na dena lia pa dang data auyaba indang asüngdang.
Abrambam-i ashiba agi, pa yaküm November nungiang mapa inyaker, aser danga mapa inyakertemia iba data lapoka amshitsü asoshi lenmang lir saka pa kisüng dang tuteta asüngdang.
“Company inyakyim ama kü phone parnoki meshia yuadok. Delhi nung onok külem mapa inyaker ki kati ni anir ao, aser yangnung jagi anir arur office nung külem mapa inyakertem tsüngdang ni kanga mejungi mezüngmeshi,” ta Abrambam-isa ashi.
Pai maneni ashiba agi, bar nung security mapa inyakertem parnok 4 pa dak azüktsü anir aru. Par 4 aser ano tangartemi dena pa dak taochi mekai azük, aser repranga alirtemi video agi. Parnoki aoyaba oset indang ashitsü asoshi maneni asüngdang, saka ni süjia oadok.
Abrambam-i ashiba agi pa Neelkanth mozüki-i anir oa aser idakji pa dang pa azükba indang mashitsü asoshi mesüzüktsü merang. Manager-i Doctor tem dang pa alanga ta ashi.
Mozüki nung kecha metendangi dang injection ka agütsür ni yokadok. Tanünü AIIMS nung trauma center semdangba sülen pai Delhi police northeast helpline den tongtep aser parnoki Gurgaon police dangi iba ken o benloktsü.
IPC nung kübok section 147, 149, 323 aser 506 nung ajemdaker nisung 7 anema FIR agütsüogo. Aibelenertem dang ano tang tashi nung asüngdangya mesüi lir.
Abrambam aser Rajeev Borah-i iba data aoyaba onok ket nung kuli lir, ta TGS CEO Punit Kumar-i ashi.
“Onok ket nung CCTV noksa lir koba nung company email ID nungi parnok juri ID-i item datatem belenba kuli lir. iba ajanga onok crore 2 akoksaogo,” ta CEO-i maneni ashi.