Gurmeet apuba ajanga Haryana nung sen 1,26,68,71,700 akoksa

Chandigarh, Aenjeti 16 (Agencies): Luroi (August) 25, 2017 anogo CBI special court ka ajanga Dera Sacha Sauda tekolakba, Gurmeet Ram Rahim nem obendang agütsüba sülen Haryana state kübok Panchkula aser tanga tesemtem nung azüdokshia lendong tulu adokba ajanga sen crore 126 takoksa alu.
Tashiyim agi tetsür raksatsüba ken o nung Gurmeet Ram Rahim aitsüba sülen Dera den anidakertemi lokti aser kija indang kiojen aika raksatsü, department aika indang saru nung takoksa alu aser security tsütsü sen aika indok.
Tang tesüsa sayuba data nung shia aliba agi, iba azüdokshi aser rongrongshirong mapang kiojen raksatsüba temelen sen meshiba ajak bendener sen 1,26,68,71,700 liasü, ta osang ka ajanga ashi.
Iba ken o nung mangatettep adokba mapang Ambala kisüng nunga sen crore 46.84 jenjang takoksa alu. Ambala sülen Fatehabad nung tensa azüoktsü mechi teyari balala agütsüba nung sen crore 14.87 indok.
Haryana nung iba azüdokshi lendong tuluba ya Panchkula nung atalok aser iba tesem nung police temi injang khashiba mapang nisung 36 taküm samaba den külemi sen crore 10.57 jenjang takoksa alu.
Hisar, Jhajjar, Rewari, Narnaul, Palwal, Jind, Nuh aser Yamunanagar amala district tem nungbo kicha teraksa meliasü.
Haryana indang Advocate General ajanga item osang tejangja ya Punjab & Haryana High Court nem agütsü. Iba court ajanga tang state nung azüdokshi adokba ken o ya angadangba mapang lir.