Gurmeet Ram Rahim aitsüba sülen nisung 32 asü, 350 yiru ; PM Modi-i Haryana nung tensa süngjemtsü ayongzüker

New Delhi, August 25 (Agencies): Haryana nung ozüng alema mapa inyakba tensa atalokba atema Prime Minister Narendra Modi-i nisung ajak dang yimjung nung alitsü ayongzükogo.
“Tanü ozüng alema mapa inyakba atema temulung raksar, Ni iba inyakyim khukhua aitsür aser nisung ajak dang yimjung nung alitsü ayongzüker. Ni NSA aser Home Secretary den iba tensa osang metetpelaogo” ta Modi-i ashi.
Hokolbarnü CBI court kati Dera Sacha Sauda tanishir, Gurmeet Ram Rahim Singh tetsür dak tashiyim agi medemba atema aitsüba sülen Panchkula nung Rahim Singh sülen anidakertemi ozüng alema mapa inyakdang nisung 32 asü aser 350 dak tema yirua lir.
Iba ken o ya 2002 küm benokba liasü.
Rahim Singh sülen anidakertemi tejashi nung state asem nung ozüng alema mapa inyaker. Haryana nung parnoki railway station 2, power grid ka aser petrol pump 2 nung mi senoktsüogo.
Tanü Panchkula nung okadaki obendang agütsüba sülen mepetmesüji adok aser Haryana o Punjab aser New Delhi tashi nung raloka ao.
Panchkula nung curfew alitsü ozüng agütsüogo aser Army column 6 tashi mapa lemzüktsüogo.
Tanü CBI judge Jagdeep Singh-i Dera tanishisang Gurmeet Ram Rahim Singh-i küm 15 dak tema pa sülen anidaker tetsür ka den tashiyim agi shi nung medem ta aitsü.
Iba ken o atema temerenshiji August 28, 2017 nü ang metetdaktsütsü ta Jagdeep Singh-isa ashi.