Gurmeet Ram Rahim küm 20 tepuokdak ayutsü

Rohtak, August 28 (Agencies): Pei sasa tsüngrem nisung ta ajar Gurmeet Ram Rahim Singh küm 20 tepuokdak ayutsü atema Hombarnü CBI special court-i temerenshi agütsüogo.
Tashiyim agi tetsür ana den shi nung medemba ken o tem nung aija okadaki iba temerenshi agütsür.
Punjab and Haryana High Court-i tuyuba ama Ram Rahim puoka aliba jail nung special courtroom ka yanglu aser idakji pa küm 20 puoka ayutsü temerenshiji agütsü. Iba obendang anema Ram Rahim Singh’er okatsürtemi temaba okadak ka nung ken o benoktsü.
Tanü Rohtak jail nung Ram Rahim-i apudaka special CBI judge Jagdeep Singh dang taochi meshia tadok meshi. Iba sülen pai ‘nisung kari ni kümzükang’ ta ola adoka okadak nungi aotsü memulung.
CBI judge Jagdeep Singh-i ken o anaprong nung küm 10 tepuokdak ayutsü aser sen lakh 15 senchi agütsütsü oshidang agütsü. Senchi nungi lakh terpezüzü tetsür ana nem teyari agütsütsü atemasa pai tetuyuba agütsü.
Tanü okadak Ram Rahim-i tatemtsü atema pa temang majung ta ashi saka chief medical officer-i pa temang tendanga reprangdang shitak dang liasü.
Dera ‘guru’ Ram Rahim-i pa sülen anidaker tetsür ana dak tashiyim agi shi nung medem ta aitsüba sülen pa sülen anidakertemi Haryana tesem balala nung lungkak ait aser idangji nisung 38 tashi asü aser 250 shi yiru.
Tesüiba anogo ishika Dera Sacha Sauda züngsemtemi state ana- Punjab o Haryana nung mepetmesü adokdakja ozüng alema mapa inyaka arur. Ajisüaka, iba jagi CBI obendanger temulung ila maküm aser küm 20 tepuokdak ayutsü temerenshi agütsü.
CBI-i iba ken o atema kanga junga mapa inyak aser Ram Rahim’er okatsürtemi tai aputsüsa onük ka dang maliasü. Tanü CBI obendangerji Rohtak jail-i tayimtsü ajanga aru aser pai telok anaprong nem minute terer agütsü.
Iba ken o nung CBI-i Ram Rahim taküm piyong tepuokdak ayutsü atema asüngdang aser külen pa atema okatsürtemi pa arishi küm tain, temang aser lokti asoshi mapa inyakbatem nung ajemdaker tadok meshi.
Dera Sacha Sauda tanishir Ram Rahim indang osang temai adoktsüba osangbener Ram Chander Chhatterpati’er jabaso Anshul Chhatrapati-i “CBI okadaki temerenshi agütsüba nung temulung asür. Onoki mapang talangka nungi Ram Rahim Singh ji asen loktiliba nung tsükchir ka ta shiyonga arur” ta osangbener dang ashi.
Iba ken o benokba sülen küm pungu shi ka lir CBI-i July 2007 nung Ambala court ka nung Ram Rahim aitsüba onük benok. Iba nung 1999 aser 2001 tsüngda Ram Rahim-i ‘sadhvis’ (tetsür tanidakertem) ana den tashiyim agi shi nung medemba shia lir.
Maneni September 2008 nung special CBI okadaki IPC nung arrla 376 aser arrla 506 kübok Ram Rahim dak tai tongloktsü.
2009 aser 2010 tsüngda tetsür ana jagi okadak tena indang kuli agütsü. Special CBI okadakji Ambala nungi Panchkula-i belen aser Ram Rahim anema benokba ken o jia Panchkula CBI Court-i belena liasü.