Gurmehar Kaur nem security agütsüogo; DCW-i Facebook nem takhangba agütsü

New Delhi, February 28 (Agencies) : Delhi University kaketshir Gurmehar Kaur-i ABVP anema sentong ka tenzükba sülen nisungtemi la tepsettsü aser tashiyim agi raksatsütsü amokmeren aser iba atema la nem security teperi agütsüogo, ta Mongulbarnü police-i metetdaktsü.
Delhi Commission for Women (DCW)-i Police Commissioner Amulya Patnaik dang Kaur amokmerenba indang osang metetdaktsüba sülen police-i First Information Report ka benokogo.
Hombarnü DCW-i Lady Shri Ram College kaketshir indang osangji police nem sangoktsü.
La online ajanga amokmerenba indang osang metetdaktsüba sülen Deputy Commissioner of Police-i la den jembi aser security teperi agütsüogo, ta police-i ashi.
IT Act nung Arrla 67 o Arrla 354 A (sexual harassment) aser Indian Penal Code nung Arrla 506 kübok FIR benokogo, ta Joint Commissioner of Police Dependra Pathak-i ashi.
RSS den sendaktepba aliba Akhil Bharatiya Vidyarthi Parishad anema lai jembiba sülen la online ajanga amokmerener ta Kaur-i DCW dang osang sangoktsü.
Ramjas College nung lungkak aitba aser ozüng alema mapa inyakba sülen, Kaur-i Facebook nung, “Ni Delhi Unversity nung kaketshir ka lir. Ni ABVP metsübur. Ni kija masü. India nung kaketshir ajak kü den lir” ta zülur metetdaktsü.
Ano, tanü Delhi Commission for Women-isa Facebook dang DU kaketshir Gurmehar Kaur tashiyim agi raksatsütsü ta amokmerenertem indang account shibangjang ta takhangba agütsüogo.
Kaur indang Facebook profile nung nisungtemi la tashiyim agi raksatsütsü ta aser tanga o tamajung aika shia amokmerenogo, ta DCW chairman, Swati Maliwal-i shidi ka nung metetdaktsü.
“La nungi onok ket nung shidi ka nguogo aser iba nung la tashiyim agi raksatsütsü ta ashiba aser o tamjung jembiba osang den noksatem dena lir. Iba kasa shidiji nenok nem agütsür” ta Swati-i Facebook dang ashi.
“Facebook nung tangar merenshir anema mapa inyaktsüla aser parnok indang social media accounts shibangtsütsüla” ta laisa shisem.
DCW chairman-isa Facebook dang Kaur merenshirtem indang contact details, IP addresses aser tanga osangtem tejangja agüjanga ta shiogo.
Taoba hopta Ramjas College nung AISA aser ABVP tsüngda mepetmesü adoka raratep. JNU kaketshirtem Umar Khalid aser Shehla Rashid na shisatokden sentong ka nung o jembitsü jaokba atema iba mangatettep ya adokba liasü.
Iba tatalokba sülen Gurmehar Kaur-i ‘Ni ABVP metsübur’ ta asüba campaign ka tenzük. La ya Lady Sri Ram college nung literature student ka lir aser la tebu ya Kargil rara nung kahset.