Guus Hiddink-i Chelsea nung Jose Mourinho melenzüktsü akok

London, December 18 (Agencies) : Netherlands nunger Guus Hiddink-i Premier League club Chelsea nung interim manager inyaktsü atema jembiogo saka pai iba onük atema telemtetba magi ta metetdaktsü.
2009 nunga Hiddink-i Chelsea nung iba mesükba mapa inyakogo aser Jose Mourinho indang mapa melenzüktsü atema pa sapur.
Tan EPL asayamong nung Chelsea-i jenjang tajung mongutetba sülen Chelsea Club-i Brehostibar nü Jose Mourinho anendaktsüogo.
“Ni osang tejangja metetpelatsü merangtsü. Chelsea-i shilem junga magitet aser iba atema kulitem lir” ta arishi küm 69 tain Hiddink-i De Telegraaf osangkaket dang ashi.
“Mezüng ni kuli tejangja metettsü aser iba sülen ang telemtetba agitsü” ta paisa shisem.
Honibar nü Chelsea-i Norwich City den asaya reprangtsü asü koda ta osangbeneri asüngdangdang, “Coach-temi asaya repranger. Ajisüaka ni asaya reprangi ayonga, ni parnok den jembishinü asüba sülen ang telemtetba agitsü” ta Hiddink-i langzü.