Guus Hiddink-i interim Chelsea manager inyaktsü

London, December 19 (Agencies) : Jose Mourinho mapa nungi anentsüba sülen Guus Hiddink-i tan season tembang tashi club nung manager inyaktsü atema aruogo, ta Chelsea-i Honibarnü metetdaktsü.
2009 nung Hiddink-i Chelsea nung manager inyakdang FA Cup takok angu aser tanga pa kasa mapa inyaktsü atema club-i meyipa aruogo.
“Ni Stamford Bridge-i tanaben aruba atema pelar. Alima nung club tulutem rongnung Chelsea ya ka lir, saka club tang aliba jenjang nung malitsüla. Ajisüaka, tan season ya asenok mashileni meyipdaktsütsü akoktsü ta ni amanger” ta Hiddink-i Chelsea indang website nung tanü metetdaktsü.
“Ni asayartem aser staff den külemi inyaksemtsü yongyar aser talisa Chelsea sapurtem den tesentaktep tajung yanglushitsü imlar” ta paisa ashi.
Chelsea sangdong nung ashiba agi, Hiddink-i Deobarnü parnok Sunderland den asaya reprangtsü saka iba asaya nungbo first-team coach Steve Holland-i ketdangsütsü.
Brihostibarnü Chelsea kibur Roman Abramovich-i Jose Mourinho mapa nung anentsü. Mourinho lenisüba kübok Chelsea-i asaya 16 nungi 9 nung tamakok anguba sülen pa mapa nungi anentsü.
2009 nunga Chelsea kibur Abramovich-i Luiz Felipe Scolari anentsüba sülen Hiddink dang nungi teyari meshia liasü.