Guwahati amaktsü atema ULFA-I-i RDX-5 belen

Guwahati, August 09 (Agencies): Paresh Baruah-i aniba United Liberation Front of Asom-Independent (ULFA-I) telungpurtemi Independence Day atongtsü anogo ka jakdang Guwahati densema district kar nung totzü refinery aser railway amaktsü atema RDX-5 tapoktsü Assam telungi bener aitogo, ta Intelligence agency temi metetdaktsü.
“Item nükjidong nung parnoki RDX-5 category tapoktsütem state telungi bener aittetogo. Guwahati tongti ser Goalpara, Tinsukia aser Dibrugarh district tem amaktsüa alok. Iba den külemi totzü refinery tem aser railways amaktsüa akok,” ta Intelligence ketdangser kati ashiba o nung ajemdaker Eastern Chronicle osang ajanga metetdaktsü.
RDX range rongnung RDX 5 ya tapoktsü tesashitiba lir, ta Eastern Chronicle ajangasa ashi.
Intelligence ketdangserisa ashiba agi, amaktsü nükjidong atema ULFA-I-i telungpur telok ana- National Democratic Front of Bodoland (Songbijit) aser Kamtapur Liberation Organisation na ayongsemogo.
Independence Day aser iba mapang nung security kanga akhanga aliba mapang nung amakba ajanga parnok temelung kanga asür, aser ibaji parnok inyakyim lir.
“Teti agia, telungpur teloktemi Independence Day mesüra iba anogo matongdang amaker, tan yabo parnoki August 15 nü tamakok ngura parnoki August 18 aser August 25 tsüngda amaktsüa akok. Independence Day sülen security akhanga maliba mapang telungpurtemi iba maongkaji agitsüa akok,” ta Intelligence ketdangserisa ashi.
Tang Guwahati nung security sepaitem kanga akhanga lir, ta police-i ashi.
“Onoki yimti nung security akhangshidagi. Onok kümküma kümogo aser security maparen maneni reprangshidagi,” ta police tongti ketdangser kati ashi.
Security atema refinery complex nung public sector company tem dena jembidagi, ta ketdangserisa shisem.