Guwahati aser Itanagar tsüngda Shatabdi mesükba train aginer

Itanagar, November 04 (Agencies) : Brihostibarnü Arunachal Pradesh Chief Minister Pema Khandu-i, Arunachal Pradesh yimtiba Itanagar anasa aliba Naharlagun aser Guwahati na tsüngda Shatabdi Express mesükba train ka jajatsüla, ta Union Minister of State for Railways Rajen Gohain dang shiogo.
Khandu-i, ainlen jajar timba akümer aser Guwahati ji Arunachal Pradesh den sendakteptsü tongti tesem ka lir anungji nüburtem nüngdakba tongtsütettsü atema Shatabdi Express mesükba train agüjang, ta Gohain dang ashiba ketdangsertemi sangdong ka ajanga Itanagar nung metetdaktsü.
Aji dang masü saka nüngdakba osettem belenshitsü atema Guwahati aser Naharlagun na tsüngda train tajung ka nüngdaka liasü. Kodang train tajung ka jajadir state nungi adokba chiyungtsütem Guwahati ajanga Northeast tesem nung dang masü saka tanga state temi yoktettsü, ta Kandhu-i ashi.
Iba den külemi Naharlagun nungi Delhi tashi hopta shia jajaba train ji anogo shia jajaba train mesüra Delhi nungi Guwahati tashi aruba train kar Naharlagun tashi jajadakjang, ta ashidang pai, state nüburtem atema quota tali kümjang, ta Gohain dang shisem.
Union Minister-i pa dang Shatabdi train jajatsü aser state nüburtem atema quota tali kümtsütsü nangzükogo, ta sangdong ajanga ashi.
April 2014 nung lapokba Naharlagun railway station nunga nüngdakba perijang, ta Khandu-isa ashi.
Pai railway link tenet tang rongdak nüngdaka kümogo, ta Railways ministry dang ashiba sangdong ajangsa metetdaktsü.
Pai ashiba link temji Itakhola nungi Seijosa (15 km), Doomdooma nungi Wakro via Namsai nungi Chokham (70 km), Dangri nungi Roing (52 km), Naharkatia nungi Deomali (20 km) aser Simaluguri nungi Kanubari (30 km) train tem lir.
Khandu-i, tang aliba Lekhapani Miao line-ia Deban, New Kamlang, Nampong, Jairampur aser Lekhapani-i meyipa arua kilometre 75 link yanglutsü aser Rupai nungi Parshuram Kund link tem yanglujang, ta shiogo.