Guwahati bomb lendong nung nisung aika yiru

Guwahati, May 15 (Agencies): Bodbar nikongtsütsü Guwahati nung shopping mall ka jakdang grenade ka apokdang nisung 9 shi yiruba osang angazüker.
Iba mapa ya Ulfa (Independent) telungpurtemi inyak asütsü akok ta temulung malemer.
Taonung 7:40 ako meta kanga dang mazüngi aliba Zoo Road nung mejangjatetba nisung kari grenade ji pokdaktsü.
Ulfa-i Guwahati nung mapa tamajung inyaktsü akok ta intelligence osang kar ajanga ashiba sülen taonung iba tesem nung police-i senzüsenbongertem mita reprangdang bomb ji pokdaktsü.
Iba lendong nung yirua alirtem rongnung Sasatra Seema Bal (SSB) jawan ana dena lir.
“Osang bushitepa aodang grenade ka pokdaktsüba ama ajiteter. Iba tesem nung naka checking alidang bomb ji pokdaktsü. Police dak tenük yoka bomb ji pokloktsü asütsü akolakok. Onoki bushisüngdang ka tenzükogo” ta Guwahati police commissioner, Deepak Kumar-i ashi.
Taonung bomb apokba tesemji Assam Secretariat nungi kilometre ka shi pilaa lir.
Tanü Assam chief minister Sarbananda Sonowal-i police aser tanga tongti ketdangsertem den Guwahati nung security akangshitsü atema senden ka amenba sülen lendong atalok.
Sonowal-i iba tatalokba aitsü aser state DGP Kuladhar Saikia dang bomb pokdaktsürtem pua merenshitsü atema tetuyuba agütsüogo.
Assam kübok Tinsukia nung parnok züngsemtem apuba anema Ulfa (Independent)-i bomb ji pokdaktsü asütsü ta osang ka ajanga ashir.