Guwahati High Court Kohima bench indang website lapokogo

Kohima, August 26 (TYO): Information technology lima den apet Hombarnü Kohima nung Profile Judge of GHC Kohima Bench, Justice S Serto-i website (kohimahighcourt.gov.in) lapoktsüogo, kong court indang Case Information System (CIS) version 1.0 densema densema lir, ta ketdangsertem osang ka ajanga metetdaktsü.
Court indang official website ajanga ashiba agi, Guwahati High Court (GHC) Kohima Bench nung tesüiba küm ka dak tema nung ken o ajak agi 1046 anüngdaka lir, aser item rongnung ozüng alema inyakba ken o 94 densema lir.
GHC Kohima Bench indang website data ajanga ashiba agi, tesüiba küm ka dak tema nung ken o 1046 anüngdaka lir aser item rongnung civil ken o 467, ozüng alema inyakba ken o 94 aser writ ken o 485 densema lir.
Item ken o nungjagi ken o 525 bo küm ka dak tema Kohima Bench nung anüngdaka lir, item rongnung civil ken o 239, ozüng alema inyakba ken o 38 aser writ ken o 248 densema lir.
CIS tenzükba nükjidong ya ken o benoker kati online ajanga ken o jenjang koma odarar metettsü atema lir, ta Registrar-cum-Central Project Coordinator, GHC Kohima Bench, Neiko Akami-i metetdaktsü. Paisa, sensotemia iba website ajanga court-i agütsüba oshidang/obendang ajak metettsü, ta ashi.
Iba site ya Gauhati High Court Kohima Bench-i design asü aser host ji National Informatic Centre (NIC), Nagaland State Centre (NSC) lir aser website nung osangtemji GHC Kohima Bench-i update sütsütsü, ta paisa metetdaktsü.
State Informatics Officer, NIC NSC, Shushanta Kumar Mondal-i, iba website lapokba ajanga GHC Kohima bench-i alizüng ka tongtetogo, ta ashi.
Paisa, district courts digitization maparen tembangba sülen item ken otemjia website nung züngoktsü, ta metetdaktsü.
Kasa sentong nung Programmer GHC Kohima Bench, Amento Asumi-i iba website nung login süa amshibayim metetdakja liasü.