Guwahati mi lendong nung ki ishika rongtok

Guwahati, November 1 (Agencies): Tanep Guwahati kübok Aathgaon, Tokobari tesem nung plastic goods godown ka nung mi adoka iba meküta aliba ki ishika dena rongtokogo, aser iba ajanga takoksa tulu aludaktsüogo. Iba lendong nung tetsür ka aser mibener na ta yiru. Mi jangrua aoba mapang nung LPG gas cylinders aika apokba ajanga mi tali jangrua ao, ta Fire Brigade deptt. Osang ka ajanga metetdaktsü.
Kasa osang ajangasa ashiba agi, parnoki iba mi inseptsü asoshi ghonda pongu shi agi.
Special Director General of Police & Director Fire & Emergency services, AP Rout-i ashiba agi, mi ya go-down ka nungi adok aser ki ajunga ya rongtoktsü. Tia kaa nisung tasübabo kecha meliasü.
Rout-sa ashiba agi, parnok dang ki arongba osang anepdang 10:30 shi nung agütsü aser mi remseptsüba atema parnoki fire tenders 15 aser hydraulic platform ka densema iba tesemi anir ao.
Mi lendong ajanga teraksatsüba adokdaktsüba indang asüngdang dang, Rout-i ashiba agi, parnoki tangbo meshitettsü, saka iba lendong nung takoksa tulu aluogo.
Mi adokba kuli indang asüngdang dang Spl DGP-i ashiba agi, “Onoki tang tashi nungbo mejangja, saka nisungkari ashiba agi, short circuit ajanga adok daktsü ta ashir aser kari tanga kuli agütsür.”