Guwahati nung AIIMS amenoktsü: Nadda

Guwahati (Assam), February 22 (Agencies): Deobarnü Health Union minister, JP Nadda-i, Guwahati ya anema aliba tsütsü yimti tiyongtsü ka kümdaktsütsü nükjidong nung yimti nung All India Institute of Medical Sciences (AIIMS) tasen ka amenoktsü asoshi Centre aser State sorkar napronglai maparen inyakdar, ta metetdaktsü.
Tanü Guwahati nung Pradhan Mantri Swasthya Suraksha Yoajana (PMSSY) scheme kübok Gauhati Medical College Hospital (GMCH) nung super-speciality block tasen ka atema lung azüngtsüba sentong nung jembidang Nadda-i, “Assam nung AIIMS tasen ka amenoktsü atema ozü sorkari sangdongogo. Yimti nung super speciality hospital ka yanglutsü atema ali dak sentakba onüktem nung ni state health minister den lemtepogo. Kimung temeten thitsütsü aser kimungji revenue department ket nungi health department dangi aotsü atema onoki inyakdar,” ta ashi.
“Kobi melii yimti nung AIIMS tasen ka amenoktsü, koba ajanga iba yimti ya anema alibaren tiyongtsü ka akümtsü,” ta Union Health minister-i ashi.
Nadda-isa, AIIMS ya state shia nung mapang lemsar amenoktsü aser taoba NDA sorkari iba ama institute 6 amenoka aliba nungi tan sorkari ano 10 amenoktsü atema inyakdar, ta metetdaktsü.
GMCH nung super-speciality block nungji yimten 190, ICU yipten 60 aser operation takdang trok alitsü. Iba block nungsa paediatrics surgery, haematology, gastroenterology, gastrointestinal surgery (GI), endocrinology aser burns & plastic surgery atema departments alitsü.