Guwahati nung ATM kanga bulua auyateper

Guwahati, September 4 (Agencies) : Anogo ishika tejaklen Guwahati nung auer pezüi ATM ta bilemer ‘bank passbook-printing machine’ ka auyaba putetba sülen police aser nübortemi asayamenü süajembiogo saka Guwahati nung auertem tali züina aoba atema ketdangsertemi khuret abener.
2011, 2012 aser 2013 kümtem Guwahati nung ATM auyaba tatalokba khenkhen dang ajurua liasü saka 2014 küm tatalokba 21 aser yakümbo 36 tashi liasü. ATM auyaba ken o timbaka yimti tiyong nung auyabatem dang liasü aser tezülen auyaba tatalokba karbo mezüngsemi lir.
Taoba Brihostibar nikongtsütsü Maligaon nungi tantsür ka mozü amshia süchia odaktsüba sülen la indang sen 30,000 auyar bener ao.
Tantsülaji ATM ka nungi sen agizüktsü atema aodang nisung ka sepaitem indang sübotsü semer arua la sen agizüktsü atema yaridi ta ashi. Iba sülen pai tantsüla nem mozü enoka aliba ‘soft drink’ bottle ka ajemtsü agütsü aser aji ajemba sülen la süchia ao, ta police-i metetdaktsü.
Yaküm Guwahati police-i ATM lapoka aliba bank tem dang aonung 10:00 ako nungi security guards mayuba ATM ajak shibangtsü atema tetuyuba agütsü. Ajisüaka, nisung aikati iba tetuyuba atalatsü. Guwahati nung ATM 450 shi ka lir aser timbaka nung security guard mali.
ATM auyaba tatalokba aika nung auertemi sen ayuba süngden ajunga bener aotsü aser idak nungjagi sen agitetba sülen süngdemtemji nisung maliba tesemtem nung toktsü.
“State balala nung auyartemi ATM nung sen auyaba süngden kakpoktsü atema motor mechanic tajungtem anioka lir aser item nisungtem jagisa gari agütsür” ta osang ka ajanga metetdaktsü.
Auertemi ATM ajungteta bener modaktsütsü atema Assam state police headquarters-i bank tem dang parnok ATM ji ali nung kanga junga azünga ayutsü tetuyuba agütsü aser bank ketdangsertemi iba tetuyuba ama inyakba sülen auertemi yimya balaka amshia auyatsü meranger.
“Auertemi taintem mesüra mezüng atema ATM amshirtem dak tenük yoka sen auyatsü meranger. Parnoki yarir ama külakokja nisungtem indang pin number meshir aser original ATM card ji taila ka den melenteper. Iba sülen parnoki sen auyazüka agir” ta osang ajangasa metetdaktsü.
Ita asem tejaklen Guwahati police crime branch-i lanur asem apu aser parnok rongnung Haryana nungi civil engineer ka dena liasü. Par asemji ATM card auyaba atema tai tonglokja apu aser parnok ket nungi taila ATM card 30 shi bena aliba apu.