Guwahati nung Bhutan tayimtsü ka lendong nungi jenbu

Guwahati, April 16 (Agencies) : Honibarnü Guwahati nung Paro (Bhutan)-Guwahati-Bangkok Druk Air tayimtsü ka rü alaba ajanga lendong tulu ajurutsü nungi jenbu.
Rü ajanga tayimtsü tejaklen raksa aser iba nung radar system enoka lir. Tayimtsüji Bangkok-i aotsüba liasü saka moutettsüsa aküm, ta Borjhar airport outpost in-charge, A Kalita-i osangbener dang ashi.
“Bangkok-i aotsü atema Paro nungi tayimtsü tanga ka yokogo” ta paisa shisem.
Tahnü anüngdang 12:30 ako meta Guwahati aser temeket nung tsüngmok atena tzünglu aruba den rü ala aser iba ya ajanga tayimtsü anendak anasa aliba Azara tesem nungbo kibong ka nungi züngsem pungu tashi yiruba osang angazüker. Parnok kidang tsüngpret alaba ajanga yiru.
Tanü ghonda ana den talangba yipru den tzünglu aruba ajanga Guwahati nung garitem headlamps tsükloker senzütsüsa aküm.