Guwahati nung BRICS Youth summit tenzükogo

Guwahati, July 02 (Agencies): Hokolbar aonung Assam yimtiba, Guwahati nung BRICS Youth Summit 2016 tenzükogo.
Hotel Brahmaputra Ashok nung anogo asemnü senden tenzükja Assam Chief Minister, Sarbananda Sonowal-i, state aser tesem nung lanurtemi BRICS linüktem nungi lanurtem den telongjem katetttsü imlar, ta ashi.
Sonowal-isa, “Iba ama sabang tulu nung state aser tesem nungi lanurtemi maongka agia taruba anogo ana nung BRICS linüktem nungi lanurtem den onük balala nung shisa lemsateptsü ta ni amanger,” ta ashi.
“Guwahati nung iba sentong tulu ayongzüka akatsü atema maongka agütsüba atema ni Ato kilonser, Narendra Modi aser Youth Affairs  & Sports Minister, Singh na dang pelaba lemsateper. Tanübo ozü state nung ranglokdar, kechiyong iba senden ajanga Assam ya alima map nung inoksemogo,” ta paisa ashi.
Kasa sentong nung jembidang Minister of Youth Affairs & Sports (independent), Dr. Jitendra Singh-i, 2016 küm Northeast ya entrepreneurship tesem ka akümtsü, ta ashi.
Paisa, “BRICS linüktem nungi alima nung lanur shilem 43, GDP shilem 30 aser alima shishilembaba shilem 17 jagi kanga nendaka aser shisa kaa inyakra 21buba putu jabiji asenok ket nung alitsü,” ta ashi.
BRICS Youth Summit 2016 tanabuba anogo, Honibarnü Yoga agia tenzük aser BRICS linüktem- Brazil, Russia, India, China aser South Africa nung züngsemtemi Skill Development & Entrepreneurship, Social inclusion, Youth Voluntarism aser yimsüsüba nung lanur shilem onüktem nung o lemtepa liasü.
Iba senden ya Deobarnü tembangtsü.