Guwahati nung Delhi tsüngda hon seret 7,000 shibelener ka apu

New Delhi, September 20 (Agencies) : Guwahati nung jenjang aketba yin shishilembar kati Indo-Myanmar arrtsü adena hon seret 7,000 jungnüa ozüng alema shibelenba atema tai tonglokja apu.
Pai honji tayimtsü ajanga Delhi-i bener aru aser pai sen crore 2,000 shi jenjang hon shibelener asütsü ama temulung malamer, ta revenue intelligence ketdangsertemi ashi.
Guwahati nungi jenjang aketba yin shishilembarji Narendra Kumar Jain lir. Tan ita tetenzüklen IGI Airport indang domestic terminal nung pa indang hon seret 10 apuba sülen Directorate of Intelligence-i pa apu.
Jain den külemi Delhi nung alir teyariteper ka revenue intelligence ketdangsertemi apu aser ketdangsertemi Jain dang asüngdangya asüdang, pai tesüiba küm 2 ser tesadang tsüngda hon shibelentsü atema Guwahati-i 617 ben ao, ta ashi.
Tanü tashi nung ozüng alema hon shibelenertemi train aser bus ajanga dang bener senzütsü puteta lir saka Jain-ibo inyakyim tasen ka ajanga hon shibelen.
Pai Indo-Myanmar ajanga 24 carat purity gold bars bener aru aser Guwahati atongba sülen pai Guwahati aser Delhi tsüngda domestic flights nung honji ‘valuable cargo’ ta ser aben.
Iba mapa inyaktsü atema pai private airline ka nung senzü aser iba jagi ketdangsertemi airline staff danga asüngdangya südar.
Tesüiba mapang Jain-i ozüng alema hon shibelenba atema tai tonglokja pua liasü. Pai sen crore 9 shi alangba hon seret 37 bena aliba atema DRI-i pa apu. February 2015 nunga Guwahati nung ozüng amertemi pa apu. Iba mapang pai hon seret 12 ozüng alema shibelenba atema aija apu aser pa bail nung chiok.
Indo-Myanmar arrtsü anasa aliba Moreh, Manipur aser Mizoram kübok Zokhawthar tesemtem ajanga hon bener arur. Myanmar nungi bener aruba hon aika DRI-i puogo aser item rongnung March 2015 nung Siliguri nung hon seret 87 aser August 2016 nung Kolkata nung hon seret 58 apubatem den alir.
August 5, 2016 nü Mumbai nung hon seret 12 apuba sülen bushisüngdanga aodang, iba kasa telok yagi sen crore 200 tema jenjang hon seret 700 tashi ozüng alema shibelenba bushitetogo.
September 11, 2016 nü Siliguri nung sen crore 5 shi alangba bendanger sen 7.5 lakh dollars apu. Senji Manipur-i aoba truck gari ka nung bena liasü aser parnoki senji Myanmar nung hon alitsü atema abenba ta ketdangsertemi bushitet.