Guwahati nung kaketshirtemi asür Rohith Vemula pusemer

Guwahati, January 23 (Agencies) : Hokolbarnü Guwahati nung kaketshir telok aikati asür Rohith Vemula nem temeten agüjang ta takhangba agüja lungkak aitba sentong agi.
Tata Institute of Social Science (TISS) nung azüngertemi yimdong nung lungkak aita jajaba sentong ka ayongzük aser iba nung All India Students’ Federation (AISF) aser Satra Mukti Sangram Samiti nungertemia shilem agi.
“Rohith Vemula dak tenük yoka tashiyim mapa inyakba aser ano pa mokdangba ajanga pa soseta asütsüsa tensa ajuruba onoki kukua aitsür. Sorkari central university ka inyakyim nung teka ia inyakba onoki aitsür” ta kaketshirtemi Tir Pranab Mukherjee dangi shidi ka nung zülur agütsü.
Iba university nung vice-chancellor P Apparao den aibelenertem ajak SC/ST Atrocities Act kübok merenshitsüla, ta Guwahati nung kaketshirtemisa takhangba agütsü.
“University-i Rohith’er kibong nungi nisung ka nem mapa agütsütsü aser ano par kibong nem sen lakh 5 teyari agütsütsüla ta onoki akhanger. Rohit densema Dalit research scholars par pungu anema police tsüngdang ken o benoka aliba agientsüla ta onokisa takhangba agütsür” ta kaketshirtemi Tir Pranab dangi züluba shidi nung shia lir.
Kaket shisatsü agütsüba rejutem nung kin, tamangba yimsü, tesem, tetsür-tebur mesüra linük maitsü dak rangloker tashiyim mapa inyakba anendaktsütsü atema Tir-i parliamentary committee ka tentettsüla, ta Guwahati nung kaketshirtemisa takhangba agütsü.