Guwahati nung lockdown atsülanger

Honibarnü lockdown hopta ka atsülangtsü osang metetdaktsüba sülen Guwahati kübok Lokhara tesem nung nisungtemi government seller ka dang nungi aonsotsü alidang agiba noksa angur. (Guwahati, July 11)

Guwahati, July 11 (Agencies): Guwahati nung nisungtem dak COVID19 maneni putetba ajanga lockdown hopta ka atsülangtsü, ta Honibarnü Assam health minister Himanta Biswa Sarma-i metetdaktsüogo.
Guwahati ajunga shibangaka, COVID19 puteter teimba akümer. Anogoshia Guwahati nung nisung 300 nungi 400 shi ka dak COVID19 puteter.
Tensa nung ajemdaker Assam health department-i Chief Secretary dang lockdown hopta ka atsülangtsü atema asüngdanga liasü, ta health minister Sarma-i ashi.
Hokolbarnü Guwahati nung citizens’ committee züngsemtemi state health department aser Kamrup Metro district administration dang Guwahati shibangba ano hopta ana atsülangtsü atema mepishia liasü.
State sorkari June 29 nungi July 12 tashi Guwahati ajunga shibangtsü tetuyuba agütsü.
“Guwahati nung nisung lakh 10 nungi swab sample lakh 1 tashi bendenogo. Iba tetezüji Kamrup Metro district nungi nütsüng yongsük 10% indang bendenba lir” ta Sarma-isa ashi.
Tang tashi nung Guwahati nung nisung 2,156 dak COVID19 puteta lir, ta paisa shisem.
AIUDF lennirtem dak COVID-19 putet:
Külen, AIUDF tanishisang Badruddin Ajmal aser tenu Sirajuddin Ajmal naprong dak COVID-19 putetogo.
Tenaprongla Mumbai nung nija mozü ki ka nung anepaludar, ta osang ka ajanga ashi.
Dhubri nungi MP Badruddin Ajmal ya mapang tatsüka acute diabetic agi timtema arur aser tesüiba anogo ishika pa blood sugar level ajema kümogo, ta osang ajangasa ashi.
Maneni, Badruddin tenu Sirajuddin Ajmal (Barpeta MP) dak-a kasa tashidak agi timtemer. Ajisüaka AIUDF nungi iba dak sendakba osang kecha mali.
Honibarnü Sadiya nungi BJP MLA Balin Chetia dak-a tanü COVID-19 putetogo.
Tesüiba anogo ishika pa aketa shirang aser Tinsukia civil hospital nung anepaludar.
Taoba mapang Assam nungi BJP MLA tem Krishnendu Paul aser Narayan Deka naprong dak COVID-19 puteta liasü.
Maneni, taoba Congress MP Sushmita Dev dak-a COVID-19 puteta lir.