Guwahati nung narikol indang sentong ka ayonga agi

Guwahati, November 29 (Agencies): Hokolbarnü Guwahati nung tang mezüng atema Northeast Buyer Seller Meet on Coconut sentong ayonga agi.
Iba sentong ya Indian Chamber of Commerce (ICC) aser Coconut Development Board (CCB) ajanga ayongzük aser ‘Coconut Prospects for Productivity and Profitability’ omen nung ajemdaker agi.
International markets den medemdangra India-i narikol nung sen teimnba yokzük, saka iba atema market tajung ka aser processing plants mali, ta CCB director Obed L-i ashi.
“Northeast nung narikol teimba tsünütetba state ji Assam lir. Assam nung Bhutan, Nepal, Bihar aser Northeast ajungalen narikol belenshir” ta Obed-isa ashi.
“Northeast nung narikol yokyayokjibaji Rs 20 crores shi lir. Guwahati nung marketing centre ka lapoktsüla aser iba ajanga narikol shishilemba nung ajungtsü” ta director-isa shisem.
Taoba küm ana tashi department-i CDB den yaritepa arur, ta horticulture department Assistant director Abdul Jalil-ia o jembidang ashi.
“Tang tashi nung narikol tsünüba, metsü alemba aser aluyimertem nem training agütsüba nung Rs 4 crores shi endokogo” ta Jalil-isa ashi.
Indian Institute of Food Processing nungi Binod Kumar Yadav-i narikol nung nutraceuticals aliba indang osang metetdaktsü.
“Narikol tzü ya northeast nung kanga dang nüngtugu lir aser iba ya bendener ayoktsü akok” ta paisa ashi.
“Technology shitak amshira narikol tzü nungi vinegar, Vitamin B12 amala agitettsü akok” ta Yadav-isa shisem.
“Assam nung küm shia narikol lakh 10 shi tsünüeter aser süngdong shia nung narikol 60 shi atanger” ta horticulture department director PK Mahanta-i ashi.
“Tangalen küm nung süngdong ka nung narikol 75 shi atanger” ta paisa ashi.