Guwahati nung NSCN-K telungpur ka apu

Guwahati, August 2 (Agencies): Assam nung Army aser Assam Police-i Naga nunger telungpur telok NSCN-K züngsem ka aser pa den yariteper ka puogo.
Nisung ana apuba ajanga parnoki Independence Day atongtsü lia Guwahati nung kiralongraba mapa inyaktsü tasa atongba nung tetsükdaktsü ajuruogo, ta Defence otongdar kati ashi.
Osang tejangja kar angazükba sülen Army aser Assam Police nati Ulubari, Guwahati nung NSCN-K züngsem, KN Chingmak Chang aser telungpur den yariteper Najimuddin Hazarika na apu, ta Defence otongdarisa ashi.
Independence Day matongdang Guwahati yimti nung ozüng anema inyaktsü atema tena aruba liasü ta Army-i temulung malemer.
Assam nung kiralongraba mapa inyaktsüa akok, ta bilemba ajanga state ajungalen kümdanga alitsü osang metetdakja lir.
Assam chief minister Tarun Gogoi-i ashiba agi, North east telungpurtem longjemer United Liberation Front of Western South East Asia (UNLFWS) tentetbaji tebilemtsü khuret ka lir, kechiyong iba nung ULFA(I) aser NDFB (Songbijit) densema lir.
NE nung telungpur anema inyakba mapa takok angutsü atema Myanmar nung jenoka aliba NE telungpur teloktem par linük nungi aridoktsüla, ta Gogoi-i takhangba agütsüogo.