Guwahati nung Rajdhani Express nungi hon ngutet

Guwahati, April 25 (Agencies): Hombarnü Government Railway Police (GPR) ajanga hon seret 3 ngutet. Item hon ya Delhi nungi aruba Rajdhani Express nung Guwahati railway station nung ngutet. Iba maparen nung police temi nisung ka pua lir.
“Mita bushiba mapang hon ‘bar’ 13 aser anu hon tila ka ngutet. Hon ya Myanmar nungi shibelenba lir aser West Bengal nung miima hon shishilembaba tesemi bener aorba liasü,” ta police osang ka nung ashi.
April ita kisüng nunga GRP temi hon seret 30-shi aser iba ken o dak sendakba nung nisung ishika pua lir.
Taoba Hokulbarnü police temi nisung asem pua lir aser parnok ket nungi hon seret 15 nguteta lir.
“GRP temi oset shibelenba nungi nokdangtsü asoshi telok ka denteta lir aser parnoki ita ka tsüngta nung sen crore 9 jenjang hon nguteta lir. Aji saka nisung peria maliba ajanga iba maparen junga meinyakteter,” ta police ketdangser kati ashi.
Taoba küm ishika tsüngda nung hon shibelenba maparen timba kümogo. Siliguri aser West Bengal nung item hon miima shishilembatsü tesem lir, ta police temi ashir. “Demonetization sülen hon shibelena ayokba maparen tajemba kümer liasü, saka iba maparen anu tenzükshiogo. Bushisüngdanger telok kati ashiba agi, Guwahati nung taoba küm ana tsüngda nung sen crore 2,000 jenjang hon shibelena yokogo,” ta osang ajanga ashi.
Bendanglen nungi hon ya Myanmar arrtsü ajanga Manipur aser Mizoram nung aliba Zokhawthar tesem ajanga shibelener.
Hombarnü GRP temi mita bushiba mapang railway station nungi Ganja seret 14 ngutet aser iba ken o nung nisung asem pua lir.