Guwahati nung ‘Science Express’ train ka tenzüktsüogo

Guwahati, February 17, 2017: Hokolbarnü Guwahati nung Assam Chief Minister, Sarbananda Sonowal, Union Railway Minister for State, Rajen Gohain aser tongtibang nisungtemi Kamakhya Railway Station nung Kamakhya-Malatipatpur Astha Circuit Train tenzüktsüba noksa nung angur. 

Guwahati, February 17, 2017 (Agencies): North East nung Agartala aser Lumding densema India nung train station 68 ajanga jajatsü asoshi ‘Science Express’ train ka tanü ayamesogo.
Iba train ajanga alima tzü-mopung melenshiba asoshi tekümdangtsü osang sangdonga ita tenet tashi jajatsü.
Ministry of Railways, Environment & Science & Technology telongjem nung tenzüktsüba, coach 16 aketba ‘Science Express Climate Action Special’ train ya Tripura aser Brahmaputra ayongküm ajanga jajatsü.
Information, case study aser tzü-mopung melenshidaktsüba nung sendaktepa aliba oset balala asoshi iba train nung coach ti lir.
Kaketshir kisüng masü saka nübur ajungai tzü-mopung melenshiba mela-mela angatettsü asoshi Environment Ministry-i yimya balala nung tesayuba agütsütsü aser osang sangdongtsü.
Kaketreju, lenmang, kidang aser office balala nung tzü-mopung koma kümzüka aser apayua amshitsü tesayubatem sayutsü.
Iba train nung class 4 nungi tsünglanglen tanurtem asoshi science, mathematics aser environment dak sendakba asayamenüdak aser kazütsü asoshi tesem balaka yuja lir.
Tanüngba coach ti nung sentong balala inyaktsü asoshi Science & Technology department aser Biotechnology department ajanga renema lir.
Iba train indang coach asem nung ‘solar panel’ inoka lir.
Kaketshirtem aser nüburtem reprangtsü asoshi iba train ya station ajak nung anentsü aser iba train jajaba ya September 8 nü, Gandhinagar station nung tembangtsü.