Guwahati nung senotsü ashikülak mapa inyaker nisung pezü apu

Guwahati, Aenjeti 22 (Agencies): Guwahati nung ghonda 24 tsüngda sen bendenba taila scheme ketdangser nisung pezü tashi Guwahti police temi puogo.
Guwahati nung amenoker aliba Subhasakti Thrift Credit Co-Operative Society Limited indang client nisung 48-i ashishiba sülen Dispur police temi Chandra Das, Paritosh Mandal, Prakash Saha aser Paresh Basak nunger apu.
Iba company nung Das ya secretary, Mandal ya chairman, Saha aser Basak na ya iba company indang board of directors nung züngsem lir, ta police-i ashi.
“Taoba küm 13 tashi ni society ka nung client liasü. Ozü kibong nung züngsem pezüprong iba society nung client lir. Onok aliba tesem nung iba company indang client 200 nungi 250 tashi lir. Iba society nung sen rizünga ayutsü asoshi sentong aika lir, kong nisung kati anogoshia agent tem ajanga sen 200 nungi 250 tashi inoka ayur. Mapa ajak junga dang liasü saka taoba hopta nungi agent ya onok kidangi sen abeni maru. Parnok phone switch off asü aser parnok office shibang,” ta Dispur police station kübok Odlabakra outpost nung aliba Sreebhumi Nagar nungi Haripad Saha-i osangbener dang ashi.
“Küm shia onoki bendenba sen nungi tetemlok shilem 6 ngua aru. Saka tangbo onoki bendenba sen 80,000 shi samaogo,” ta shishilembar Haripad-i ashi. Dispur police nem ashishitep ken o benoker rongnung Haripad ya densema lir.
Pua aliba nisung pezü rongnung Mandal, Saja aser Basak nungertem ya Dispur police station-i Küptoknü nikongdang anir ao aser Das ya pa-sasa police dangi Amungnü ao.
Parnok ya IPC Section 420 (cheating & dishonesty), 406 (criminal breach of trust), 34 (acts done by several persons in furtherance of common intention) aser Prize Chits & Money Circulation Schemes (Banning) Act Section 5 temzüng kübok apu. Parnok ya police ket nung anogo pongu ayutsü yok.
“Iba ken o nung senotsü amshiba kuli tejangja monguteti lir,” ta Assistant Commissioner of Police (Dispur), Sujit Saikia-i ashi.
Iba inyakyim nung nüburtem indang sen crore 26 amhia alitsü südi, ta osang ajanga ashir. Client tem indang passbook nung shia aliba agi, iba company indang head office ya Guwahati nung aliba Udalbakra Main Road nung Bandana Bhawan tanabuba floor nung lir.