Guwahati nung tetong tepsetba atema tetsür okatsür ka apu

Guwahati, January 6 (Agencies) : Guwahati Police-i arishi küm 27 tain okatsür ka tetong asüba dak sendakba ken o nung aija puogo aser okadak kati la police ket nung anogo ananü ayutsü temelaba agütsü.
Taoba Hombar nikongtsütsü BCCI-accredited cricket scorer Anupam Das, Shantipur nung tetsürlar kidang azü aika yimdoka sür lia angu.
Iba dak sendakba nung tasüsanger kinungertemi Bharalumukh police station nung tetsürlai pa tepset ta ken o ka benok.
Hombarnü Das-i tetsürlar kidangi aodang tetsürlar medemer ana tashi liasü, ta police-i ashi.
“Tetsürlar medemertem jagi kuli agütsür. Parnoki ashiba agi Das-i tetong den ajuruteptsü atema aru aser mapang tatsüka dang lir külen tena raratep. Idangji Das-i kotari ka bena aru aser pa sasa tsüngset” ta crime branch ketdangser kati ashi.
Iba dak sendakba nung postmortem aser autopsy reports ano mangu saka osang ka ajanga ashiba agi kotari jagi Das temulungjang kanga mejungi yiru.
Pa yiruba sülen Das-i kimai alutsü merang saka azü aika yimdokba agi pa asü, ta police-isa metetdaktsü.
“Iba ya pei sasa taküm agiba, lendong mesüra nisung tepsetba inyakyim-ar onoki ano mejangjateter. Onoki tetsürlaji pua lir kechiyong lai kotari aser atem merükteta kuli samatsütsü merang” ta police ketdangser kati ashi.