Guwahati nung yi jemer gari anirtem licence agientsü

Guwahati, January 9 (Agencies) : Guwahati nung yi jemer gari aniba azüoktsü atema district transport office-i yi jemer gari anir indang licence agientsü telemtetba agiogo.
Iba inyakyim ya Supreme Court-i tetuyuba agütsüba lir aser Deobar nungi 27 buba Road Safety Week tenzükba anogo nungi mapa küma inyaktsü.
“Onoki gari lendong tajemba kümdaktsütsü atema meranga inyaker. Gari lendong teimbaka yi jemer aniba ajanga ataloker aser iba jagi onoki Supreme Court tetuyuba sülen anidaktsü telemtetba agi” ta Guwahati deputy commissioner of police (traffic) Pranab Jyoti Goswami-i osangbener dang ashi.
“Iba ozüng kübok mezüng aibelener indang licence ita asem atema agientsü” ta Goswami-isa ashi.
2014 küm Guwahati nung gari lendong 1,124 atalokba nung nisung 304 asü aser 2015 nunga gari lendong 1,156 nung nisung 303 süogo.
“Yi jemer gari aniba ajanga lendong timbaka ataloker. Iba sülen tetsüng agi senzürtemia aibelendang lendong ataloker” ta Goswami-isa metetdaktsü.
“Deobar nungi asenoki 27 buba Road Safety Week amungtsü aser iba nung nisung ajaki shilem agia gari lendongtem mataloktsüsa azüoktsü mepishir” ta state transport department Commissioner, Shamsher Singh-ia metetdaktsü.