Guwahati nungi company kati taxi service tenzüktsü

Guwahati, Rongjui (September) 14 (Agencies): Guwahati nung amenoker tenzükba telok kati India kübok yimti 98 nung on-demand cab services tenzüktsü.
Iba service dang ‘Wify Cab’ ta ajatsü aser Aspiring Ideas and Future Tech Solutions ta ajaba company-isa app-based ambulance services tenzüktsü.
“Onoki tang market surveys inyakdar. Onoki cabs 2,000 shi aniokogo. Durga Puja matongdang Guwahati nung mezüngbuba service tenzüktsü” ta Aspiring Ideas and Future Tech Solutions, CEO Mridul Das-i tanü osangbener dang ashi.
Company-i Goa aser Port Blair dak alia smart city ajak nung services tenzüktsü, ta paisa ashi.
Wify Cabs ajanga kilometre shia sen 5 agitsü aser peak time pricing mesüra night charges kecha magitsü, ta Das-isa shisem.
Wify Cabs app ajanga parnoki ambulance service atema hospitals aser private owners den sendakteptsü ta CEO-isa metetdaktsü.
Parnok company ket nung sendong crore 1.2 lir aser ibaji ajanga mapa tenzüktsü, ta paisa ashi.