Guwahati railway station nung Bangladesh nunger 31 apu

Guwahati, Mongputeni (October) 15 (Agencies): Hombarnü Guwahati railway station nung tetsür 8 dena Bangladesh nunger 31 apu.
“Parnok ya Guwahati-Bangalore Express ajanga Bengaluru nungi Guwahati-i aru. Parnok Agartala-i aotsü atema Kanchanjungha express train ataa liasü” ta Superintendent of Railway Police, Hemanta Kumar Das-i ashi.
“Parnok dang asüngdangya asüdang parnok Bangladesh nunger ta nangzük aser küm pezü tejakdang kulikaket shitak mebeni India-i aru. Parnok Bengaluru nung aayangba mapa inyak” ta Das-isa ashi.
“Parnok Agartala-i aotsü aser arrtsü adena Bangladesh-i aitsü sentong lir. Par 31 rongnung tebur 10, tetsür 8 aser tanur 13 lir” ta paisa shisem.
“Teburtem den tanurtemji Bengaluru nung rag-pickers ama liasü aser tetsür kar kilir ama aser kar hotel nung sorochioker aser tanga mapatem inyaka liasü” ta Deputy Superintendent of Railway Police, Guwahati Iftikar Ali-ia ashi.
Durga Puja mapang parnok Bangladesh-i aotsü atema Assam-i aru. Parnoki mezüngbo tetsübo agi kecha mashi saka tatsüka lir külen tesüiba küm 4 tashi India nung ozüng alema liyonga arur ta nangzü, ta Ali-isa metetdaktsü.
Tanü Mahendra Mohan Choudhury Hospital (MMCH) nung parnok temang tendang aser asüng Chief Judicial Magistrate, Kamrup (M) tsüngdang anir oa ken o benoktsü.