Guwahati railway station nung IED ka ngutet

Guwahati, August 18, 2017: Hokolbarnü Guwahati Railway station anasa remote control ajanga robot amshia temulung melemi bilemba juli ka nung IED ali-mali tendangba noksa nung angur. 

Guwahati, August 18 (Agencies): Hokolbarnü Guwahati railway station nung lendong tuluka ataloktsü aliba nungi kümzükogo.
Rail Mail Service ajanga book asüba juli ka nung IED tulu ka enoka liasü saka ibaji putetba ajanga lendong matalok.
Iba juli nung bomb enoka lir ta putetba sülen Assam Police nungi Bomb experts jaoka IED ji bener ao.
“IED ji seret 8 nungi 10 tsüngda ka asütsü aser iba indang tashiji meter 100 shi nung kongshila” ta ketdangser kati ashi.
Bomb ji Rani nung tesem kati bener oa pokdoktsü, ta ketdangserisa shisem.
IED enoka aliba juliji Guwahati general post office nung book asü aser Brihostibar aonung railway station-i bener aru, ta Railway ketdangsertemi ashi.
“Tanep onoki julitem pei pei tesemi yoktsü atema anepalua reprangdang, Silchar-i yoktsü atema book asüba juli ka nung anütetsü ka indang ola angashi” ta Railway Mail service nung ketdangser kati ashi.
Idangjisa home guard kati juliji balaka agiteta ayu aser Railway Police nem osang sangoktsü.
Tanü Police aser tanga security forces-i Guwahati railway station ajunga sniffer dogs aser bomb detectors amshia mita reprang.