Guwahati tsür kati Android game ka yanglutetogo

Guwahati, January 22 (Agencies): Pungmang aser tebilemba tasen ka ataloka inyaktsü asoshi kodanga temono mali aser iba ochi o den sentaktepa Guwahati nungi tetsür kati android game ka yanglutetogo.

Aditi Das Bhowmik ya tang Singapore nung lir aser lai Android game, ‘Run Fairy Run’ sayaogo koba Google Playstore ajanga agizüktettsü.

Iba game nung tanela tamajung keta aliba tetsür kati ain tajung keta alir tetsür ka meyong ainlong auyaba ajanga ain samadaktsür la yima motetba angutsü. Ajisüaka lai kechi südir süaka iba long kanga memonodang bushitetsü nüngdanger.

Aditi-i ‘software developer’ mapa magi kechiba süra lar jala temang manemi timba aliba ajanga ‘daycare’ nung meyutsünür. Ibaji ajanga la kidang dang amunger.

Kidang amungba mapang la aser nüngbo Shourabh nati computer game ka yanglutsü mesüra app kar yanglutsü apitet, ta lai ashidang, ni iba amala mapa kanga jangrar, ta shisem.

Cognizant aser Oracle den inyakdanga lai computer games mesüra app yanglutsü asoshi inyakdangnüa liasü. Ajisüaka Multinational Corporation (MNC) tem nung inyakdang la item mapaji inyakdangtsüsa mapang madok.

Aditi ya St Mary’s Convent, Maligaon nung azüng aser iba sülen Cotton College nung class 12 tashi azüng.

La 2005 küm Assam Engineering College, Guwahati nungi graduate asü aser yangjisa electronics aser telecommunication agi.

Ni tesüiba mapang nungi purapitetba mapa kanga jangra liasü, ta lai ashi.

Ni iba game ya 2014 küm nungi yanglutsü tenzük aser iba mapa nung nüngdakba app tem kaket o YouTube nungi angazükba den külemi kinüngbo software engineer sangia temetetsü kar ashi, ta Aditi-i ashi.

Iba game ajanga ni kwi ajangzüktsüar ni masadangtetba ajanga ni online ajanga angati anguba software tem amshia iba game yanglu. Iba game ya tanür tain ajaki asayatettsü, ta lai ashi.

Transrail Logistics, Guwahati, nung marketing executive tejen Nischol Dev-i, “Iba game ya temulung ajak bendanga magütsüra masayateter aser asen meyonga kanga karatsü nüngdaker. Ni iba game kanga meimer,” ta ashi.

“Iba game ya jangratemtsüka lir. Game tenzükli nungi kanga temulung agütsü nung dang ashi süadoktsü,” ta Guwahati nung nija institute ka nung tesayur, Sayan Das-i ashi.

Tech entrepreneur Prakhar Bindal-i, iba game ya nisung noklang katibosa download asüba sülena shitakbaji asadangtettsü. Tang tashi nung nisung 10-i dang download süa lir, ta ashi.

“Iba game ya kanga junger. Ajisüaka nisung aikati tereprangtsü ajungba game sayaner anungji UI/UX (design & graphics) tajungba küma melenshira tang dang nung tesapuba küma nüngutugu akümtsü. Iba ya lai app store asoshi yangluba mezüngbuba game lir aser lai kanga meranga inyakogo,” ta pai shisem.