Guzman jena orr minute 18 süi’er ang tanükertem pa takdang-i ai

Mexican navy temi February 22, 2014 nü Joaquin “El Chapo” Guzman puer külen teka anaprong alener helicopter alidaki anir aoba iba noksa nung angur.

 Mexico City, July 17 (Agencies): Ozüngi memelaba mozü shibelener tettsüti Mexico nunger Joaquin “El Chapo” Guzman tepuokdak nungi jener külen, tepuokba tesem anükertemi pa puoka ayuba takdang atongtsü atema minute 18 tashi agia liasü, ta ketdangsertemi ashi.

Interior Minister Miguel Angel Osorio Chong-i ashiba agi, Guzman ayuba tesem nung aliba surveillance camera tem repranger tanukertemi pa maliba metetli yongi, pa malia, ta metetdaktsü.

Congress security committee den pa ajenba ken o jembitsü ajurutepba mapang Osorio Chong-i, “Tanükertem pa ayuba takdang tonga arutsü atema minute 18 tashi agi,” ta ashi.

Iba nung bushisüngdangertemi tepuokdang tesem nung aliba ozüng shitak amshi asü mamshia’ar bushisüngdangdar.

Altiplano, tepuokdak tesem ya Mexico city nungi kilometre 90 shi pilar lir aser pa ajenba sülen kishi ajak shibanga lir anungji ketdangsertema tunnel ajanga danga senzür.

Pa tzü chikoba tesem nung aliba tapok ka nungi ajenba sülen ketdangsertemi ola madoki aliba, tangang mezüng tanükertemi minute kwi nung pa ayuba takdang atong ibaji metetdaktsü.

Guzman-i pa tzü chikoba tesem nung apudakba sorkar camera ka ajanga tan sayuogo.

Iba sülen Sinaloa telok nung tanishisang ya kilometre 1.5 talang tunnel ka, koba nung rail apu lir ibaji ajanga motorcycle ka nung jenteta tugo. Tanükertemi pa ayuba takdang atongtsü minute 18 tashi agiba ajanga pa ajentsü asoshi mapang peria agütsü.

Guzman ajenba sülen asüngdangyatsü asoshi ketdangertemi, tepuokdak inyaker tanishir 22 pua yua lir. Ajisüaka ano shinga maitsüi lir.

US teyari ajanga 2014 February ita nung Guzman ya apu aser ita 17 dang lir pa jenogo.

Attorney General Arely Gomez-i, Guzman ajentsü hopta ana lia US-i pa parnok nem agüjang ta temepishiba ka June 25 nü Mexico dangi yoka liasü, ta lar office nungi sangdong ka ajanga metetdaktsü.

Gomez-i, bushisüngdangertem iba temepishibaji ngur külen koma asü ibaji jungjunga asadangang, ta kasa sangdong ajanga ashi.

Guzman ajenba asoshi Mexico nung ketdangsertemi kanga sasar aser US-i meshizükba mangaba asoshi sasa bilemer kechiba süra US nung aliba tepuokba tesemtemji Mexico dang nungi tashi taitba lir.

Gomez marudang Attorney General alisang Jesus Murillo Karam-i yaküm ashiba agi, US nem magütsü tashi Guzman ya Mexico tepuokdak yua alitsü.