Guzman tanaben aputsü maparen nung Mexico den yariteptsü melunga lir: US

Washington, July 13 (Agencies): Ozüng alema mozü mora shibelener mongin, Jaoquin ‘El Chapo’ Guzman Mexico tepuokdak nungi ajenba ajanga tebilemtsü khuret tulu bener arutsür ta shia, Guzman tanaben aputsü maparen nung par US-ia Mexico den amalitepa yariteptsü melunga aliba olen ka US Attorney General, Loretta Lynch-i tanü Hombar nü metetdaktsüogo.

Mexico nung tentetba ozüng alema mozü mora shibelentsü telok, Sinaloa lenisang, Guzman ya ozüng alema mozü mora shibelenba aser telok tenteta ozüng alema US nung inyakba ken o aika nung ajemdaker US sorkari aputsü ozüng adokja aliba osanga jangjaogo.

Ano külen, Mexico City anülulentip tsütsülen tentetba tepuodak nungi tunnel ka ajanga ajensang, Guzman tanaben aputsü asoshi Mexico ajunga nunga mitkar aser police ketdangsertemi nungdakba maparen tang teinyakdak lir.

Taoba mapang, 2001 nung Mexico nungsa tentetba tepuokdak tanga ka nungi ajenba densema Guzman-i tan agi tanaben buba tashi tepuokdak nungi jenteter lir.

“Guzman-i tan tepuokdak nungi ajenba ajanga Mexico ajunga nem tenüng menok tulu bener arutsüogo. Ajisüaka, ozü mitkar aser police ketdangsertemi Guzman tanaben pua arutettsü ta parnok dak tamang akar,” ta Mexico Tir, Engrique Pena Nieto-ia yashi Deobar nü metetdaktsüogo.

Tepuokdak ketdangsertemi yaria Guzman-i tepuokdak nungi ajentsü maongka angu ta temulung malemba yong tepuokdak ketdangsertem dena tasüngdangba sentong tagidak aliba osang ka pai metetdakja liasü.