Gwalior nung tanur ayokba mozü ki ka putetogo

Bhopal, April 19 (Agencies) : Madhya Pradesh Gwalior district nung nija mozü ki ka nung maginüba kinü tanur sen ai-i agi yoktepa ‘baby farm’ inyakyim ka police-i kanga dang takok ngua putetogo.
Times of India (ToI) osang ajanga ashiba agi, Gwalior kübok Murar tesem nung shiranger ayiptsü yiten 30 aliba mozüki ka nung tashiyim agi tanur bentsübatem aser tenük tasen adoka medem dang bentsüba tanurtem sotsür aser item tanurtemji tanur aginertem dang sen ai-i agi ayoker.
Tanur ayokba puteter MP Police temi mita aoba mapang mozü kidang inyakertemi kinü tanur ana ayoktsü aliba kümzüka lir.
“Uttar Pradesh aser Chhattisgarh nung alir tanur mali kijungtem dang tanur asembo yokogo,” ta crime branch ASP Prateek Kumar-i ashiba ToI osang ajanga metetdaktsü.
Iba inyakyim tamajung indang rasaa ashiba mapang, Kumar-i, kodang tetsür ka aser lar tsüraburtemi tim masüba tsütsü nungi bena aruba tanur raksa-a intoktsü atema mozü kidangi aoer yangji aliba doctor temi iba tanurji kanga junga aser shingaia memeteti sotsütsü tenangzükba agütsür, ta ashi.
Tanur sotsüba sülen tetsü kidangi yoker aser mozü kidang inyakertemi item tanur ayoktsü asoshi kijung tajung bushir, ta bushisüngdanger kati ashi.
Iba dak sentakba nung mozü ki director TK Gupta aser tanur alir tsüraburtem dena tang tashi nung parnok nisung pongu, 370 (buying or disposing of any person as slave), 371 (Habitual dealing in slaves) aser 373 (buying minor for the purpose of prostitution) ozüng kübok police-i pua lir.
Parnok tang pua alirtem dang asüngdangyaba mapang, mozü ki manager Arun Bhadoria-i, Chambal tesem nung parnok atema inyaker kar lir aser item jagi tim masüba tsütsü nungi mashisa kümer aliba tetsütem parnok dangi anitsür arur, ta ketdangsertem dang ashi.
Ozüng alema tanur ayoker ta osang tejangja angashiba sülen police temi iba mozü ki Honibar aonung mita oa liasü.

You must be logged in to post a comment Login