Gwyneth Paltrow-i Coldplay indang ken ka nung shilem agi

November 25, 2015: Oscar award angula, Gwyneth Paltrow ya kentener telok ‘Coldplay’ nung tongti kentener, Chris Martin den küm 10 tashi apuani süa lir 2014 küm dena palaogo ta sangdonga liasü, ajisüaka tenati sosema aliba tanur ana mechi nung tena tesentaktep junga dang lir.
Tan ita tetenzüklen Coldplay indang record tasenba A Head Full of Dreams nungi ‘Everglow’ ken nung Gwyneth-i shilem agia tenogo.
Chris Martin-i taoba mapang pa kinüngtsü Gwyneth-i ajungmesoa ken ka nung “How come things move on/ How come cars don’t slow,” oren zülu, anungji iba ken record asüba mapang lai iba tekongji atentsüla, ta shia liasü.
Coldplay indang kensep tasenba December 04, 2015 nü sayatsü aser iba kensep nung Beyonce, Noel Gallagher aser Avicii nungeria shilem agia lir.
Gwyneth-i shilem agia ken atenba ya tang mezüng masü saka 2000 küm ‘duet’ film nung Huey Lewis den külemi shilem agiba sülen tenati ken ka tenogo aser Glee soundtrack atema Fleetwood MAC’s Landslide indang version-a ka tenogo.
2010 küm film Country Strong nung lai tamakok ajurur kentener ka shilem agia adoker. Lai guitar atemtsüa kanga meranga angazükogo aser iba film atema soundtrack ka nunga shilem agiogo.
Chris aser Gwyneth nati yaküm March ita nung tena palaba osang sangdonga liasü. Tena chir jala arishi küm 11 Apple aser jabaso arishi küm 9 Moses sosema lir.