H & FW Kilonser P. Longon-i Mokokchung semdang

Mokokchung, Oct 30 (TYO): Nagaland Health & Family Welfare minister, P. Longon-i Mokokchung district nung aliba mozüki balala semdanga district nung nüngdakbatem repranger ogo. Pa den ano health & family welfare department nungi tongti ketdangsertem kar densema liasü. Longon aruba temaitsü pai mozü kidang shiranga amunger ajak den sensaksemba den sen noklang pungu-ngu teyari agütsü.
Longon-i tanep mezüngbuba Impur Hospital semdanger külen Mokokchung T.B Hospital, Nurse Hostel, tang teyangludak CMO office, CMO quarter tasenba aser tesülen Imkongliba Memorial District Hospital (IMDH) semdanga yangji doctor, nurse aser district CMO office nung ketdangsertem den mensem ka ali.
Senden nung minister Longon-i jembidang, Mokokchung district nung mozükitem ngur temulung kanga süogo (tenük süngogo) aser iba mozü kidang nübur aika taneptsü anguba indang osang angashia pelar ta metetdaktsü.
Mokokchung nung aliba mozükitem ya yangi alir nüburtem atema kisüng masü, saka temeket kidanger district-tem asoshia kanga tongtibang lir, anungji, “iba khuretji mamadoki ano maneni meranga inyakdaktsüner” ta paisa tayongzükba ka agütsü.
District ajak nung matong-majen aser mepiribajibo alitsübasa, saka mozü kidang kechi aka, itemji tajungtiba nung amshia pei mapa nung tamakok maludaktsütsü paisa ashi.
“Mozü nüngdakra onok dang shiang, saka mozütemji kata expire mesüdaktsüi nüburtem yaria kanga junga amshidaktsüner” ta paisa ayongzüka ashi. Paisa doctor-tem dang temesepba chiyungtsü nungi azüoka/pilaa alitsü asoshi ajungshi.
Iba osangbeneri Minister-ba dang “IMDH nung aliba cancer arongba ki “radio therapy” ya kechiba tang tashi mapa meinyaker?” ta metetnüa asüngdang, saka pai melangzüi dept nung ketdangser ka dang langzüdakja “ibaji timtem kar aliba ajanga metenzükteti lir, saka sangküm-yanü tashi nungbo mapa akümtsü imlar” ta ashi.
Iba osangbenerisa “dept nung teinyaktsü sentong kar ashitsü asü?” ta asüngdangdang, “tang district balala sema jajaba mapang teinyaktsü reprangtetbatemji benteper rongdak nüngdakbatemji tama ser inyaktsü” ta Longon dang asüngdangba ka dept nung ketdangserisa langzüa liasü.
Pa Mokokchungi aruba temaitsü yangi tasümang ayuba ki/takdang (morgue) ka yanglutsütsü nangzüker ogo. Pai ano Oct 31 honibarnü Wokha district semdanga pa tour sentongji yangji tembangtsü ta angazüker.
Iba senden nung H&FW nung Principal Director Dr. Nandira Changkija, Commissioner & Secretary (H&FW) M Patton IAS, Mokokchung CMO Dr. SS Akaba, IMDH M.S Dr. Medem nungertem den ano ketdangser kari shilem agia jembi.