Hafiz Saeed ya International kiralongrar ka lir: MEA

New Delhi, February 20 (Agencies): Hombarnü India sorkari, Mumbai amaktsü sentong asameyangsang aser Jamaat-ud Dawah tongti, Hafiz Saeed ya International kiralongrar ka lir aser pa tekaratiba nung okadaki anir arutsü nüngdak, ta ashi.
“Alima linüktemi Hafiz Saeed den par telok nem tapet temerenshi agütsütsüla,” ta Ministry External Affairs ketdangser kati ashi.
“Saeed ya international kiralongrar ka lir aser Mumbai amakba sentong asameyangsang lir, iba den külemi Pakistan kidanger linüktem anema kiralongrabaji pa ajanga lir,” ta ketdangserisa ashi.
Yashi Pakistan Defence Minister, Khawaja Asif-i, “Saeed ajanga lokti nem lendong tulu bener arutsütsü,” ta jembia liasü.
“Kiralongraji tamangba yimsü kecha dena sendaktepa mali. Kiralongrartemji Khristantem mesüra Muslim nunger masü, mesüra Buddhists aser Hindu nunger masü. Parnokji kiralongrartem lir, aser parnokji ozüng alema inyakertem lir,” ta Deobarnü Asif-i sentong ka nung ashi.
Pakistan’er Punjab sorkari Anti-terrorism Act (ATA) nung Saeed aser pa den yarisema inyaker rongnung ka, Qazi Kashif nunger züngoka lir. ATA nungji Abdullah Obaid (Faisalabad nungi) aser Zafar Iqbal o Abdur Rehman Abid nungera züngoka lir.
ATA fourth schedule nung densema aliba Saeed den nisung pezü taküm January 30 nungi tenzüka Lahore nung ‘house arrest’ kübok lir.
Parnok ponguji Jamaat-ud-Dawa (JuD) aser Falah-i-Insaniyat (FIF) nung züngsemtem lir ta Interior Ministry-i züngokogo.
Ano Saeed den JuD aser FIF lenir 37 Exit Control List (ECL) kübok züngoka lir, koba ajanga parnok linük toktsür aotsü memelar.