Hague okadaki South China Sea ken o angadangtsü onük agizüker

The Hague, October 30 (Agencies): The Hague kübok tentetba international okadaki South China Sea ken o angadangtsü onük yashi Brehostibar nü agizükogo.

China-i tashishi aketba South China Sea nung par mitkar terenemshibaren agiba den sentakba ken o bentettsütsü asoshi Philippines-i taoba mapang onük benok aser The Permanent Court of Arbitration (PCA)-i iba onükji tan agizüker lir.

“South China Sea den sentakba ken o ya United Nations Convention on the Law of the Sea (UNCLOS) temzüng kübok aiter aser iba yongji international okadak nung iba ken o benoka angadangtettsü temeten lir,” ta shia, PCA okadaki iba ken o ji agizük.

Ajisüaka, “South China Sea den sentakba ken o ji iba tzüyim tesem nung densemba asetkongtem madak yimsü asütsü ken o linük balala rong nung adokba lir aser kasaji PCA pangdak kübok maiter,” ta shia, par linüki iba ken o angadangba sentong nung shilem magitsü renemba den külemi, kasa ken o nung agütsüba obendanga magizüktsü lemtetba osang ka China’er tongti ketdangsertemi tanü, Hokolbar nü metetdaktsüogo.

Ano külen, “UNCLOS ozüng kübok yimjung nung South China Sea den sentakba ken o angadanga kasaji bentettsütsü asoshi PCA-i onük agizükba atema pelar,” ta Philippines linük tenüng nung tongti okatsür, Florin Hibay-ia tanü metetdaktsü.

PCA-i South China Sea ken o angadangtsü asoshi onük agizükba atema pelaba olen ka Washington-ia metetdaktsüogo.

South China Sea kübok densemba asetkong ajunga par yimli kübok aiter ta China-i züngshia, par linüki tashishitsü aketba tzüyim tesem nung asetkonga ishika renemtsü tenzüka lir.

Ajisüaka, tongti international trade route densemba tzüyim shilem balala par yimli kübok aiter ta China den kidangsüa aliba linüktem, Philippines, Brunei, Malaysia, Taiwan aser Vietnam nungeria metetdakja lir.

Aji oda, Philippines-i tanü tashi nung benokba ken o 15 rong nungi ken o 7 tashi okadak benoka angadangtsü aser ken o 7 den sentakba kuli tejangja Manila nungi meshitsü asoshi PCA-i lemteta lir.

Iba ken o den sentakba o bendang sangküm, 2016 küm tashi nung agütsütsü asoshi PCA-i sentong renemba osanga jangjaogo.