Haiti yimsüsürtemi Jocelerme Privert Interim President shimogo

Haiti Tir menden bena atatsü asoshi yimsüsürtemi shimsang, Jocelerme Privert (Tiyongtsü)-i Haiti kübok Port-au-Prince yimti nung Tir menden abentsü tenangzükba agiba sülen linük naklu ken atenba anga nokdaka ataba noksa nung angur. (Port-au-Prince, February 15)

Port-au-Prince, February 15 (Agencies): Haiti yimsüsürtemi election agia Tir tasenba shimba jakdang par linük Tir inyakdaktsütsü asoshi legislative lenisang, Jocelerme Privert Interim Tir shimogo.

Haiti yimsüsürtemi taoba Honibar aser Deobar na senden amenba sülen taoba Haiti Tir, Michel Martelly melenzüka par Tir menden bena atatsü asoshi Privert shima liasü.

Linük temzüngi melaba ama Martell-i taoba Deobar nü Tir menden toktsüba osanga jangjaogo.

Haiti linüki par Tir tasenba shimtsü election sentong ita ishika tsüngda nung agitsü renema lir.

“Haiti linük ajunga nung terenlok lidaktsütsüsa ni Haiti sorkar anitsü nangzüker,” ta Privert-ia Tir menden benokba sülen metetdaktsü.

“Ni Haiti linük tensa mejungi mekümdangtsütsü nükjidong nung Tir menden toktsütsü lemtetogo,” ta Martelly-ia Tir menden toktsüba jakdang metetdakja liasü.

Martelly melenzüka Haiti Tir menden abentsü asoshi yaküm, 2015 küm October ita agiba Tir election nung candidate 54 tashi toktepa shilem agiba sülen par linük nung yimtenren mangatettep ken o tulu adok aser iba yongji Martelly-i anojungi Tir mendenji toktsütsüsa aküm.

Nüburtemi mesapuaka, Tir candidate, Jovenel Moise-i election nung temaba jenjang angutsüsa yaküm Tir election nung ochimashi inyakba osang bushitetba sülen nüburtemi yimti yimdong nung longkak aitsü tenzük aser opposition telokia Tir election 2 buba sentong nung shilem magitsü lemtet.

Haiti madak tashiyim agi yimsü asüsang, Jean-Claude Duvalier küm 30 tejaklen yimsüsütsü menden nungi tashiyim agi atsüngdokba sülena Haiti nung yimtenren mangatettep kanga sashia adokba ajanga par linük tensa tanga mejungi lir.

Yamaji yimtenren mangatettep adoka tensa mejungi aliba yong nütsüng yongsük nisung million 10 shi aliba Haiti linük ya Western Hemisphere nung tentetba linüktem rong nung sensaktiba linük kümogo.