Haj lendong nung asür India nunger 58 jungogo

New Delhi, October 04 (Agencies): Taoba ita Saudi Arabia nung Muslim nunger Hajj benjung mapang nisung nungtepba ajanga atalokba lendong nung India nunger asür 58 jungogo aser nisung 78 samar mangur, ta tanü External Affairs Minister, Sushma Swaraj-i metetdaktsü.
Minister-isa, samar aliba India sensotem angutsü atema sorkari meranga inyakdagi, ta ashi.
Swaraj-i twitter ajanga, “Haj lendong nung India nunger 58 süogo. Senso 78 mangur. Asen nübur ngutettsü atema onoki ajak merangdangdar,” ta ashi.
Saudi ketdangsertemi ashiba agi, September 24 nü temeshi yimti, Mecca anasa nisung nungtepa lendong atalokdang Muslim nunger temeshi aieni aor 769 süogo.
Bendanger ketdangsertem aser osangbenertemi ashiba agibo, kasa lendong nung nisung 1,036 süogo.
Sept 24 nü Mina nung temeshi aieni aortem temenen dak lung agi aontsü nungtepa aoba mapang iba lendongji ataloka liasü.
Iba anogo nung temeshi aieni aortem lung jara asem nung temenen dak lung agi aontsü atema Jamarat-i aoba mapang lokti tulu nungtepba ajanga iba lendong atalok.
Iba lendong dak sentakba nung par linük-i ketdangsüba osangkaket, Saudi Press Agency-i ashiba agi, iba lendong ya Makkah nungi kilometer pongu shi pila oor Jamarat-i aoba lenmang ana ajurutepba tesem nung atalok.