Haj lendong nung India nunger asür nisung 45 jungogo

New Delhi, September 28 (Agencies): Tawa Saudi Arabia, Makkah anasa Muslim nunger tamang aieni aortem nungtepa lendong atalokba tatalokba nung India nunger temeshi aieni yirua alirtem ano nisung 10 süogo, aser ibaji densemabo India nunger temeshi aieni aor asürtem ajak agi nisung 45 jungogo, ta tanü Hombar nü External Affairs Ministry osang ka ajanga ashi.

External Affairs Minister Sushma Swaraj-i twitter ajanga, “Haj mapang ajemsetba lendong ajanga asür India nunger 45 jungogo. Tang asen senso temeshi aieni aor nisung 50 Saudi Arabia nung aliba mozüki balala nung lir,” ta ashi.

India nunger yirua alir tesüiba ghonda 24 tsüngda asür nisung ter rongnung nisung asem West Bengal state nungi, Kerala aser Jharkhand na nungi nisung ana-na, Tamil Nadu o Maharashtra na nungi nisung kaka aser Saudi Arabia linük nungi alir India senso ka densema lir.

September 24 nü Saudi Arabia, Mina kübok Makkah anasa Muslim nunger ‘Haj’ tamang aieni aortem temenen dak lung agi aontsü nungtepa aoba mapang lendong tulu ataloka nisung 1000 dak tema süogo.

Küm 25 tsüngda Muslim nunger temeshitiba tamang aieni aoba ‘Haj’ mapang lendong tamajungtiba tanabubaji tan atalokba lendong ya liasü.

Par yimsü nung nung jara asem nung temenen dak lung agi aoner, aser tawa temeshi aieni aortem Jamarat-i aoba mapang lenmang ana ajurutepdak iba lendong tulu ataloka liasü.