Hajj lendong nung asür 719 rongnungi India nunger 14 lir

Mina/New Delhi, September 25 (Agencies): Yashi Saudi Arabia, Mina nung temeshi aieni aortem nungtepba ajanga lendong adoka nisung 719 asürtem rongnungi India nunger 14 densema lir aser 13 yirua liasü.
Iba lendong nung ajak senteper nisung 863 yiruogo. Yashi linük 180 nungi temeshi aieni aor nisung million ana dak temai ‘Haj’ dak sentakba nung shilem agia liasü.
Taküm Haj nung India nungera nisung lakh 1.5 dak temai shilem agiogo. Muslim yimsü nung tamanger kati akümli mapang nung khenbosa temeshi aieni oa Mecca semdangtsüla.
Yashi tamangertemji lenmang balala ana nungi lenmang ana ajurutepdak tesem nung ajurutepdang iba lendong atalok.
‘Asen consul general Jeddah-i iba lendong nung India nunger 14 ajemsetba osang agütsüogo,” ta tanü India External Affairs Minister Sushma Swaraj-i twitter ajanga metetdaktsü.
Iba lendong nungsa India nungera parnok 13 yiruogo, ta laisa ashi. “Züngdangba tejangjajibo Saudi ketdangsertemi ang jangjashitsütsü,” ta laisa shisem.
Hajj dak sentakba nung temeshi aieni aortem jagi Jamarat ta ajaba tongshitem nung lung tenet agi aontsüla. Item tongshiji temeneni ainkar Abraham tendangba tesem lir ta parnoki amanger.
Hopta ana tejaklena Mecca nung aliba Grand Mosque nung merang ka laoba lendong nung India nunger 11 densema nisung 109 asü.
Yashi lendong nungsa Iran nungera nisung 131 aser Pakistan nungera nisung trok süogo, ta ketdangser osang ajanga metetdaktsü.
Hajj committee nung mendenbuba aser Saudi Arabia Crown Prince, Mohammed bin Nayyef-i iba lendong atalokba kuli bushisüngdang tenzükogo.