Hajo raliwalir mongjen ka kümdaktsütsü:CM

Guwahati, August 17 (Agencies): Assam Chief Minister Sarbananda Sonowal-i Hajo tesem linük nung raliwalir mongjen ka kümdaktsütsü asoshi sangdongogo.
Kamrup, Geruwa, Hajo nung Manasha Puja Platinum Jubilee benjungmong nung jembidang Sonowal-i ashiba agi, Hajo ya ‘pilgrimage’ tesem tejen ka lir aser raliwalir mongjen tongtibang ka kümdaktsütsü asoshi nükla lir, kechiyong state sorkari Hoja nung terenlok bener arutsü asoshi kanga temolung agüja inyakdar.
Hajo ya nüngtugu ‘pilgrimage’ tesem tejen ka aser iba tesem nung ki tejen aika aliba indang süoka jembidang Sonowal-i ashiba agi, state sorkari iba tesem wazüka ayutsü asoshi sentong tapet yangludar aser taruba küm budget nung iba sentong kicha atemaa benoktsü.
Chief Minister-isa ashiba agi, Hajo ya tangatettep aser tesunep aliba tesem ka lir aser Hayagriva Madhav Temple, Powa Mecca nunger amala tesemtem ajanga jenjang balala nung aliba nüburtem tsüngda telongjem tali akangshidaktsür.
Assam süngtonglitong agi ampokbanga aliba ajanga state adena or alir raliwalirtem tali puatsü asoshi tashi lir, ta Sonowal-i ashiba den külemi sorkari süngtong crore 10 atemtsü asoshi nükjidong ayuba aser iba dak sendakba nung maparen tenzüka aoba pai metetdaktsü.
Sonowal-i Geruwa nung Manasha Puja aser Hajo nung Borgaon semdanga goddess manasha dang state nung nüburtem terenlok asoshi sarasadema liasü.