Hakchang yimtsüng nung Special Outreach Programme agi

Dimapur, Aenjeti (TYO): Tuensang kübok Community Hall, Hakchang nung Directorate of Field Publicity Ministry of I&B ajanga Special Outreach Programme (3rd Quarter, 2nd phase) ayonga agi.
Iba sentong nung EAC, Tuensang, Tshelhi-ü-i tongti tesemdanger ama shilem agi aser iba sentong ya Beti Bachao Beti Phadhao aser Swacchata Abhiyaan atema agiba liasü.
Sentong nung FPO, Tuensang, Lhouzotuo Casavi-i okila jembidang Ministry of I&B-i Hakchang yimtsüng nung Beti Bachao Beti Pahdao outreach programme agitsü atema tetuyuba agütsü ta ashi.
DCPO, Tuensang, N S Khaki-ia o jembidang sex ratio ajema akümba indang khuret lemsatep.
India nung sex ratio ajema akümbaji tetsürtem tajemzükba tia nung amshiba, tepok nung tetsür raksaa endokba ajanga lir ta N S Khaki-i ashi.
Paisa tetsür tanur shisaluyimba aser tetsür health care indang nüngdakba metetdaktsü.
Jr. Er. PHED, P. Ngaman-i Swacchata Abhiyan indang o jembidang tzü tajemtsü, metsümeshidak tajung, hygiene aser tema nung metsümeshiba indang onüktem lemsatep.
Sentong nung tongti tesemdanger Tshelhi-ü-i nübortem dang scheme tem nungi tajangzük peria angutsü ayongzük.