Halep-i mezüngbuba Grand Slam kokogo

Paris, Aami 9, 2018 (Agencies): French Open tennis asayamung tetsür kija küptoknü/Saturday final asaya nung Romania tsür Simona Halep-i iba asaya mezüng set nung America tsür Sloane Stephens den 3-6 agi tamakok anguba sülen tanüngba set ana nung lai kanga dang meranga 6-4, 6-1 agi takok ngua Grand Slam mezüngbuba koktetogo.
World No. 1 nung alila Halep-i taoba asayamung final balala asem tashi nung tamakok nguogo. Item asem rongnungi ana jibo taoba kasa asayamung nung tamakok ngua liasü, saka taküm asayamung nung Halep-i kanga dang bendanga aguja asayaba ajanga iba takok angu. Iba asaya ghonda 2 sür minute 3 agia liasü.
“Iba asaya game tatembangbuba nung ni joko tango mesashitettsü ama bilem,” ta Halep-i ashi.
Taoba US Open asayamung nung takok angula America tsür Stephens-i iba asaya nung mezüng set 6-3 agi takok ngur tanabuba set nung 2-0 agi Halep jakdang aliba mapang terprangertemi Grand Slam takok marok ya tanaben Stephens-isa angutsü amai imlasüta liasü, saka kanga tatsük asüba ajanga la anibelemadok aser idangji Halep-i maongka agia asaya.
Arishi 26 tain Halep-i iba asaya set tatembangbuba nung kanga tashiita asaya aser lai ‘unforced errors’ 5 dang menaa liasü.
“Taoba küm kasa asayamung final nung ni aibelenba yimyatem melenshia taküm tajungba nung shilem agiogo. Iba takok ya kü atema pungmang ka ama aser iba asayamung nung takok anguba ya jangratemtsüka lir,” ta Halep-i ashi.
Arishi küm 25 tain Stephens ya taoba küm temang nung timtem ailba ajanga world ranking nung jenjang 957 tashi lur liasü.
Amungnü/Sunday iba asayamung tebur final asaya nung World No. 1 nung alisang Spain nunger Rafael Nadal aser Austria nunger Dominic Thiem na tsüngda nikongdang 6:30 ako nungi tenzüka asayatsü.