Halep, Nadal -i Madrid Open nung takok angu

May 14, 2017 (Agencies): Romanian tsür Simona Halep-i France tsür Kristina Mladenovic madak takok ngua Madrid Open title benogo.
Halep-i küm 4 tsüngda nung Madrid open final asemben tashi tongteta lir aser lai taküm final asaya nung Mladenovic 7-5 6-7 (5-7) 6-2 agi akok.
Mladenovic teberem irur liaka lai kanga meranga asayaa deciding asayatsüsa asayatet. Lai junga asayaba ya Halepi la racquet makokba tejashi nung metsüdokba ajanga jangjatsür. La racquet metsüdokba ajanga ‘code violation’ ka agizük.
Ajisaka Halep-i asentenshir asayaa, ghonda 2 sür minute 43 agia lai iba asaya akok.
Lai tangtashi clay nung asayaba asaya 25 nung 22 bo koka lir aser iba ita tatemlen French open nung akoktsü imlaba tem rongnung züngsema shilem agitsü.
“Iba title ‘defend’ sütetba atema kanga pelar. Iba takok ya kü asoshi kanga tongtibang lir, kechiyong iba ajanga asayamong tulu nung shilem agitsü asoshi küsasa dak temolunga lema kümdaktsür,” ta Halep-i ashi.
“Ni asayamong tulu akoktsü asoshi kü asaya junga lir ta ni bilemer. Ni tekolo nung terenemshiba alitsü nüngdaker. Taküm küm tetenzük nung kanga mejungi asayaa aru saka dangbo ni junga asayateter aser kanga temolung lema bilemer,” ta laisa ashi.
Mladenovic-i la teberem nung timtema asayaba jangjashitsü, saka lai ashiba agi, “küna tsüngda final asaya kanga tajung liasü aser kü tamakok asoshi kü teberem nung timtem aliba dak metongloktsüner.”
Tetsür tarep final asaya nung Martina Hingis aser Chan Yung-Jan nati 6-4 6-3 agi Timea Babos aser Andrea Hlavackova na kokogo.
Maneni, Deobar nikongdang Rafael Nadal aser Dominic Thiem na tebur final asaya nung Nadal-i 7-6(8), 6-4 agi takok angu.
Thiem atema mezüngbuba ATP World Tour Masters 1000 final nung pai kanga meranga asayaa Nadal den toktep, saka tatem nung pai punguben tashi champion Nadal madak tamakok angu.
Tanü Madrid Open final nung takok anguba züngsema Spain nunger Nadal-i 30 buba ATP World Tour Masters 1000 sempet agizükogo aser Novak Djokovic den otsü kasa yanglutet.