Halle nung Federer aser Aegon Classic nung Kvitova-i takok angua

Halle Westfalen, June 25 (Agencies): Wimbledon atongtsü anasa asayaba Halle tournament nung tebur kija tennis final Deobarnü asayaba nung Roger Ferderer-i Alexander Zverev madak takok nuga iba asayamong pai tokoben kokogo.
Taoba hopta Stuttgart nung Switzerland nunger Federer ya Tommy Haas-i tsükdaktsü saka Halle nung final asayadang pai Zverev madak 6-1, 6-3 agi takok angu.
Wimbledon asaya July 3 nungi tenzüktsü lir, aser iba asayamong nung Federer-i iba asayamong marok ti-ben buba abentsü asoshi asayatsü.
Italian Open akoksang, Zverev-i tesüsa asayaba final asem kokteta lir, saka Halle nung final asayadang 18 ben tongtibang takok marok bena alisang, Federer-i minute 53 nung koktet.
“Ni kanga junga asaya, tetenzük nungi kanga junga asaya amai ni bilemer,” ta Federer-i Halle takok marok agizüker jembidang ashi.
“Halle asayamong nung tanü tajungba asaya. Mapang talangka anisüngzüker ni tang tashi taitba kümogo aser Wimbledon atema ni renema lir,” ta pai-sa shisem.
Arishi küm 35 tain, Federer ya taküm clay-court kata nunga masaya aser pai taküm Australian Open tournament densema takok marok pezü nguteta lir aser anaben dang tamakok ajurua lir.
Tanü asaya takok anguba ajanga Federer-i ATP Tour title 92buba koktetogo.
Petra Kvitova-i Birmingham nung takok angu
Birmingham, June 25 (Agencies): Birmingham nung Aegon Classic tetsür tennis kija final Deobarnü asayaba nung Petra Kvitova-i Australia tsür, Ashleigh Barty madak 4-6, 6-3, 6-2 agi takok angu aser iba takoki ajanga Wimbledon nung la contender tajung ka asütsü, ta sayuogo.
2011 aser 2014 Wimbledon Champion, Kvitova ya taoba küm December ita lar kidang ashi-auor-i auyaba mapang la dak kotari agi atsüngba ajanga asaya kata nunga shilem magiteti arur taoba ita French Open nungi shilem agir.
Czech tsür arishi küm 27 tain, Kvitova-i Aegon Classic final akokba asaya nung aces 13 tashi ngutet.
Küm asem tejakdang Wimbledon final nung Eugenie Bouchard madak takok anguba sülen lai grass-court nung final kata masayadangi aru.
“Ni grass-court nung final asayatsü jangrar. Hopta ana tsüngda ni final (Wimbledon) asayanür, saka iba jenjang tongtettsü asoshi ni meranga inyaktsüla,” ta lai osangbener den jembidang ashi.