Halle Open: Federer semifinal nung tsükogo

Halle, June 18 (Agencies): Switzerland nunger tennis asayar mongin, Roger Federer-i semifinal asaya nung tamakok ngua tang tasayadak Halle Open tennis asayamong nung joko toktepa shilem magitettsüsa jenjang tamajung tanü, Honibar nü ajuruogo.
Germany nunger asangur, Alexander Zverev-i points 7-6 (7/4), 5-7, 6-3 ngua taoba mapang Halle Open takok marok 8 ben tashi agizüksang, Federer tsükdaktsü.
Arishi küm 19 tain Zverev-i Federer tsükdakja tan final asayatsü jenjang anguba ya pai tennis asayatsü tenzüker tanü tashi nung ATP Tour final tanabuba nung asayatsü jenjanng angur lir.
Tebur World No. 38, Zverev-i Austraia nunger Dominic Thiem aser Germany nunger Florian Mayer na tsüngda asayaba tanabuba semifinal asaya nung takok angur den final asayatsü.