Halliluya ! Praise the Lord, MTLT !

~ M. Mayang, Artang Ward.

Tobur tajung Mokokchung Town indang jembitsüji asadangra jembir mejembima. Nokinketer shishakar aser liner tajung sotettak lima Tsüngremi mezüja 28 January 1890 küm shimtet, koda jangratemtsü.
Asadangra Naga lima jila balala ajak dang nungi temerüktiba tobur tajung aser nisung sotetpangtet-a tanger dang nungi kanga techiraba. Anungji alima sülen anidaktsü masü saka libaliro ajak nung ochishia alima tejakleni anitsü kanga tongtipang ta angateter.
Asenoki shisadangdi, 31st January 2016 anogo MTLT, Police, aser Administeration Mokokchung Town-i anir Arkong Ward nung Fair Price shop ka nung kechi atalok. Aser iba jang ji (Rice) kechi nungi aru aser shiba ajanga agütsür. Iba amala mapa tamajung yabo kanga aroka bushidangtsüla.
Kechiyong Mokokchung Town shishilembadak jang (Rice) alir saka Public Distribution System (PDS) , (F&CS) nungi aruba jang dang mapang talangka alia chiyongogo. Kasa iba ken o nung sentakba nung ano nisung ka Additional Director Supply Office nung inyaker ka Court-i jar maruba Feb 10/16 anogo Nagaland Post nung Non-Bailable arrest warrant agüja angu.
Süra iba nisung ya Administration aser Police-i apu mapu ? Mepui lira iba nisüng ya tanüla ka dangbo masü südi ? Mesüra temaba menden nungi tekümzüker kar ali asü koma asü ta shisadanger.
Aji dang masü, ano NP March 10/16 Sub-Divisional Education Officer (SDEO) ajanga supply asüba School tanur nem Midday Meal atema agütsüba jang ka noksa nung angur ! Ya kechi tesüngmangtsü ? Food Safety Officer itemla reprangtsü aliba jagi meteter na ? MOkokchung District koba dang “Land Of Pioneers” ta ajar iba limaji asenok ajaki apayudi.
Item ajak mapa ya memeteti liasü saka MTLT (Mokokchung Town Lanur Telongjem) ketdangsürtemi ochishia tasü itta nübur ashioktsüba mapa temai adoktsü nung parnok tenüng kanga asanger. Anungji item amala ashikülaker nübur ashioktsür yabo tatempang tashi bushia Mokokchung Town nübur kümzükang ta onok sarasadem.
Ano aji dang masü Naga Lima State ngur Küm 53 jungogo saka Mokokchung temeket nung lenmangtem reprangdangang. 1960 nungi 1970 tashi nung yangluba lenmang asem küm 53 jungoko saka Mokokchung temeket nung lemangtem reprangdangang. 1960 nungi 1970 tashi nung yangluba lemang aser black topping ano maoer.
Aji dang masü ano Mokokchung Town jila nung tebilemtsü tulutibaji tzü tebilemtsü lir. Techipami Water Project toa koda asü ? Pipe enoker meter rent connection bail dang teimba agütsübaji masü saka tzü arutsüla.
Item ajak ya Mokokchung Town nung lokti tentet balala mesüra MTLT yagi Mokokchung Town nübur meima taroktiba nung ken bushia asen nübur anisüngzük ngudaktsütsü nenok ketangser dak teimla tulu nüburi tamang ayur.
Aji mesüra 2013 nung asen lima benjong ka nung Prof.Paul shibai asen lima ngua süngmanga O jembidang, “If You Cannot Make Roads and Human Necessity Then Follow Animals,” ta ashi, iba nungji dang alitsüsa akümtsü amai bilemer.