Hamilton-i Hungarian F1 GP takok marok angu

Budapest, July 24 (Agencies) : Deobarnü Britain nunger F1 Mercedes gari anisang, Lewis Hamilton-i Mercedes telok nungisa, Germany nunger Nico Rosberg ajateta tua Hungarian Grand Prix takok marok nguogo.
Hungaroring circuit, Budapest nung iba tetktepba tetenzük dangbo Hamilton Rosberg sülen tanabubaser tenzük, ajisüaka pai ajateta iba takok marok angu, ta Efe osang ajanga metetdaktsü.
Tang gari anitsü toktepba nungi anisüngzüker alisang, Germany nung Michael Schumacher aser Hamilton naprongi Budapest nung takok pezübenben ngur aliba tanü iba takok ngusemba ajanga Hamilton iba tesem nung takok timba angusang kümogo. Iba tesem nung pai takok ponguben angur kümogo.
Tanü iba takok anguba ajanga pa point 25 tali nguogo aser ibaji ajanga Hamilton-i Rosberg dang nungi point 6 agi timba küma pa No 1 kümogo.
Iba tetoktepba nung Australia nunger Daniel Ricciardo (Red Bull)-i tasembuba aser Germany nunger Sebastian Vettel (Ferrari)-i pezübuba jenjang nung takok angu.